ФИФА президенти Жанни Инфантинонинг маоши у ташкилот раҳбари лавозимида бўлган даврда тўрт баробарга ошгани маълум бўлди. Бу ҳақда Le Monde нашри хабар бермоқда. Манба маълумотларига кўра, амалдор 2025 йилда 5,27 миллион евро миқдорида даромад олган.
Инфантино 2016 йилда ўзидан олдинги раҳбар Зепп Блаттер ўрнини эгаллаган ҳолда ФИФА президенти этиб сайланган эди. Швейцариялик Инфантино раҳбарлигининг биринчи йилида 1,28 миллион евро даромад қилган. Шунингдек, Инфантино 2022-йилги жаҳон чемпионатини Қатарда ўтказганлиги учун 1,29 миллион евро миқдорида мукофот олгани таъкидланмоқда.
Инфантинонинг ФИФА президентлиги муддати 2027 йил 30 мартда тугайди. Аввалроқ, ташкилот 2016 йилдан 2019 йилгача бўлган даврни Инфантино президентлигининг биринчи муддати сифатида ҳисобламасликка қарор қилган эди. Шу сабабли, амалдор 2027 йилда кейинги муддатга қайта сайланиш имкониятига эга бўлади.
