Бунда "Бунёдкор" бош мураббийи Илёс Зейтуллаев иштирок этди.
- Ўйин ҳақида фикрингиз?
- Авваламбор жамоамизни Ўзбекистон Кубоги кейинги босқичга чиққани билан табриклайман. Кетма-кет иккита ғалабага эришдик. "Қизилқум" билан ўйин осон кечмади, навоийликлар яхши жамоа эканини биламиз. Биринчи таймда устунлик биз томонда бўлди, танаффусдан кейин рақиб ўйинни ўз қўлига олди. Рақиб ҳужумчиси Норхонов жароҳат олди ва унга соғлиқ тилайман. Унинг жароҳат олиши бизга ҳам қаттиқ таъсир қилди. Унинг тезроқ соғайиб майдонга қайтишини тилаб қоламан.
- Уч йилдан кейин давлат томонидан футбол клубларини қўллаб-қувватлаш дастури муддати ўз ниҳоясига етади. Нима деб ўйлайсиз, шундан кейин футбол "ўладими"?
- Яхши савол. Менимча, бу борада якуний қарор қабул қилинишидан олдин яхшилаб ўйлаб кўрилади. Ҳозирги ҳолатдан келиб чиқиб бу дастурдан воз кечиш ўзбек футболи даражасига катта таъсир қилади. Биз шу даражага етдикки, футбол ўзгаряпти, яхши легионерлар келяпти, маҳаллий футболчилар ҳам ўзимизда тўп тепяпти. Шу боис ўзига ҳомий топа олмаган клублар бирданига қийналиб қолади деб ўйлайман. Бу эса барибир таъсир кўрсатади. Чемпионат савияси ҳам тушиб кетиши мумкин. Мен ҳаммаси фақат яхши бўлишини истайман. Уч йил ичида муҳтарам Президентимиз кўмаги билан клублар ўз ҳомийсига эга бўлишига умид қиламан. Албатта, мен масаланинг икир-чикирини тушунмайман, лекин мураббий сифатида футболимиз ўсишда давом этишини хоҳлайман. Шунда ҳаммаси яхши бўлади.
- Жамоангиз гуруҳдаги учинчи тур ўйинига қандай муносабатда бўлади?
- Биз уйда "Жайхун"га қарши ўйнаймиз. Биринчи ўрин билан гуруҳдан чиқишни хоҳлаймиз, шу боис охиригача курашамиз. Жамоамизни бир нечта футболчи тарк этди, таркиб ўзгаряпти, аммо ўзимиз қатнашадиган мусобақаларда охиригача курашишни мақсад қилганмиз. Футболчиларимиз кўп нарсага қодир деб ўйлайман.
