Angliyada “Chelsi” va “Manchester Yunayted”, “Liverpul” va “Arsenal” o'zaro to'qnash keladi. Italiyada Milan derbisi bo'lib o'tsa, Germaniyada “Bavariya” va Dortmundning “Borussiya” klubi o'rtasidagi principial raqobat davom etadi.
Championat.asia’ning “Hafta o'yini” rukni istisno tariqasida “Hafta o'yinLARi”ga o'zgaradi va ushbu to'rt uchrashuv oldidan jamoalarning turnir jadvalidagi holati, so'nggi natijalari, o'zaro bahslar tarixi va asosiy intrigalarga nazar tashlaydi.
“Chelsi” - “Manchester Yunayted”: ikki jamoa ham g'alabaga muhtoj
Angliya Premer-ligasining 9-turida “Chelsi” o'z maydonida “Manchester Yunayted”ni qabul qiladi. Ikki klub ham so'nggi turda mag'lub bo'lgan va bu safar ochko yo'qotishni istamaydi.
Londonliklar sakkiz turdan keyin 13 ochko bilan beshinchi o'rinda bormoqda. Jamoa to'rtta g'alaba, bir durang va uchta mag'lubiyat qayd etgan. “Manchester Yunayted” esa bor-yo'g'i etti ochko jamg'argan va 16-pog'onada joylashgan. Mankunianliklar sakkiz uchrashuvda atigi bir marta g'alaba qozongan.
“Chelsi” 24 oktyabr kuni “Tottenxem”ga 0:2 hisobida imkoniyatni boy berdi. Vaholanki, undan avval “Everton”ni 2:0, “Bornmut”ni 5:1 hisobida enggandi. Bu natijalar londonliklarning imkoniyatlari etarli ekanini, ammo jamoaga barqarorlik yetishmayotganini ko'rsatadi.
Hafta o'rtasidagi Angliya Liga kubogi bahsi ham mezbonlar foydasiga yakunlanmadi. “Chelsi” “Liverpul” bilan asosiy vaqtda 1:1 hisobida durang o'ynab, penaltilar seriyasida 5:6 hisobida mag'lub bo'ldi.
“Manchester Yunayted”da esa muammolar jiddiyroq. Mankunianliklar Premer-ligada ketma-ket oltita o'yindan beri g'alaba qozona olmayapti. So'nggi turda “Bornmut”dan 0:3 hisobida engilgan jamoa undan avval “Lids”, “Tottenxem” va “Fulxem” bilan durang o'ynagandi.
Chempionlar ligasidagi natijalar ham qoniqarli emas. “Yunayted” “Atletiko”ga 0:2, “Komo”ga esa 1:4 hisobida yutqazdi. Jamoaning himoyadagi muammolari ayniqsa shu uchrashuvlarda yaqqol ko'rindi.
Biroq o'zaro bahslarda so'nggi paytlarda mankunianliklarning qo'li baland kelmoqda. “Manchester Yunayted” 2025 yil sentyabrida “Chelsi”ni 2:1, 2026 yil aprelida esa 1:0 hisobida mag'lub etgan.
Uchrashuv 31 oktyabr kuni, soat 17:30 da start oladi.
“Liverpul” - “Arsenal”: “Enfild”da kimning seriyasi uziladi?
Sakkiz turdan keyin “Arsenal” 21 ochko bilan ikkinchi o'rinda bormoqda. Londonliklar ettita g'alaba va bitta mag'lubiyat qayd etgan. Peshqadam “Manchester Siti” ham 21 ochko to'plagan, ammo to'plar nisbati bo'yicha ustunlikka ega.
“Liverpul” esa 15 ochko bilan to'rtinchi pog'onada. Mersisaydliklar to'rt marta g'alaba qozongan, uch bor durang o'ynagan va bir marta mag'lub bo'lgan. Demak, “Arsenal” bu bahsga raqibidan olti ochko oldinda yetib kelmoqda.
Mersisaydliklar barcha musobaqalardagi so'nggi besh uchrashuvda g'olib bo'ldi. Jumladan, Premer-ligada “Brentford” 2:1, “Brayton” 2:0 hisobida mag'lub etildi. Chempionlar ligasida esa “LASK” ustidan 6:3, “Vilyarreal” ustidan 4:3 hisobida g'alaba qozonildi.
“Liverpul”ning hujumdagi samaradorligi e'tiborga molik. Jamoa ushbu to'rt uchrashuvda 14 ta gol urdi. Biroq “LASK” va “Vilyarreal”ga qarshi bahslarda jami oltita gol o'tkazib yuborilgani himoyada ham muammolar borligini ko'rsatadi.
29 oktyabr kuni “Chelsi”ga qarshi Liga kubogi bahsida ham mersisaydliklar g'olib chiqdi. Asosiy vaqtdagi 1:1 hisobidan keyin penaltilar seriyasida 6:5 hisobida ustun kelindi.
“Arsenal” ham chempionatda yaxshi natijalar qayd etmoqda. Londonliklar so'nggi uch turda “Lids”ni 2:1, “Nottingem Forest”ni 1:0 va “Everton”ni 2:0 hisobida mag'lub etdi. Uch o'yinda atigi bitta gol o'tkazib yuborilgani jamoa himoyasi ancha ishonchli harakat qilayotganidan dalolat.
Chempionlar ligasida “Bavariya” bilan 2:2 hisobida durang o'ynalgani ham “Arsenal”ning kuchli raqiblarga qarshi kurasha olishini ko'rsatdi. Biroq Angliya Liga kubogida “Flitvud”ga penaltilar seriyasida mag'lub bo'lish londonliklar uchun kutilmagan natija bo'ldi.
O'zaro uchrashuvlar tarixi ham qiziq. 2026 yil yanvardagi bahsda gol urilmagan, 2025 yil avgustda esa “Liverpul” 1:0 hisobida g'alaba qozongan. Undan avvalgi ikki chempionat o'yini 2:2 hisobida yakunlangan.
Uchrashuv 1 noyabr kuni, soat 21:30 da start oladi.
“Milan” - “Inter”: derbida so'nggi natijalar ahamiyatlimi?
Turnir jadvalida “Inter”ning ustunligi sezilarli. Jamoa to'qqiz turdan keyin 25 ochko bilan birinchi o'rinda bormoqda. Sakkizta g'alaba va bir durang qayd etgan “neradzurrilar” hali chempionatda mag'lub bo'lmagan. “Lacio” ham 25 ochko to'plagan, ammo qo'shimcha ko'rsatkichlar bo'yicha “Inter” peshqadamlik qilmoqda.
“Milan” esa 18 ochko bilan beshinchi pog'onada. “Rossonerilar” to'qqiz o'yinda beshta g'alaba, uchta durang va bitta mag'lubiyat qayd etgan. Ikki jamoa o'rtasida etti ochkolik farq bor.
“Milan” derbi oldidan biroz qiyin davrni boshdan kechirmoqda. Jamoa so'nggi uch uchrashuvidan ikkitasida mag'lub bo'ldi. Yevropa ligasida “Bornmut”ga 0:3, chempionatda “Bolonya”ga 2:4 hisobida imkoniyat boy berildi. Ushbu o'yinlar oralig'ida “Udineze” ustidan 2:0 hisobida g'alaba qozonildi.
“Rossonerilar” uchun asosiy muammolardan biri - natijalardagi beqarorlik. Jamoa “Atalanta”ni 3:2 hisobida engishi yoki “Zalcburg” darvozasiga to'rtta gol urishi mumkin, ammo keyingi uchrashuvda raqibiga yirik hisobda imkoniyatni boy beradi.
“Inter” esa derbiga ketma-ket to'rtta g'alaba bilan kelmoqda. Jamoa A Seriyada “Bolonya”ni 3:1, “Fiorentina”ni 2:1, “Veneciya”ni 2:0 hisobida mag'lub etdi. Chempionlar ligasida esa “Shaxtyor” ustidan 1:0 hisobida ustun keldi.
Bu to'rt o'yinda “Inter” sakkizta gol urib, atigi ikkita gol o'tkazib yuborgan. Natijalarga qaraganda, jamoa hujum va himoya o'rtasidagi muvozanatni yaxshi saqlamoqda.
Biroq so'nggi derbilar tarixi “Milan” foydasiga. “Rossonerilar” 2025 yil noyabrida “Inter”ni 1:0, 2026 yil martda ham 1:0 hisobida mag'lub etgan. Shuningdek, 2025 yil aprelidagi Italiya kubogi uchrashuvida ham “Milan” 3:0 hisobida g'alaba qozongan.
Uchrashuv 31 oktyabrdan 1 noyabrga o'tar kechasi soat 00:45 da start oladi.
“Bavariya” - “Borussiya”: peshqadamlik uchun Germaniya klasikosi
Ikki jamoa etti turdan keyin 17 ochkodan jamg'argan. Har ikkisi beshta g'alaba va ikkita durang qayd etgan, hali mag'lub bo'lmagan. “Bavariya” to'plar nisbati bo'yicha birinchi, “Borussiya” esa ikkinchi o'rinda bormoqda.
Myunxenliklar etti o'yinda 25 ta gol urib, atigi oltita gol o'tkazib yuborgan. Dortmundliklar hisobida esa 12 ta gol va to'rtta o'tkazib yuborilgan to'p bor. Bu raqamlar “Bavariya” hujumda ancha samarali, “Borussiya” esa himoyada ishonchli harakat qilayotganini ko'rsatadi.
Myunxenliklar so'nggi o'yinlarda ham hujumda juda faol. “Bavariya” Germaniya kubogida “Magdeburg”ni 6:1, Bundesligada “Frayburg”ni 3:1, “Leyptsig”ni esa 6:1 hisobida mag'lub etdi.
Ushbu uch g'alabada jamoa 15 ta gol urgan. Ayniqsa, “Leyptsig” va “Magdeburg”ga qarshi uchrashuvlar myunxenliklarning hujumdagi imkoniyatlari qanchalik yuqori ekanini ko'rsatdi.
Biroq “Bavariya” ham har bir o'yinda g'alaba qozonayotgani yo'q. Chempionlar ligasida “Arsenal” va “Viking” bilan durang qayd etilgan bo'lsa, chempionatda “Augsburg”ga qarshi bahs ham 2:2 hisobida yakunlangan.
“Borussiya” esa so'nggi uchta uchrashuvda g'alaba qozondi. Dortmundliklar Germaniya kubogida “Verder”ni 3:2, Bundesligada “Ayntraxt”ni 1:0, Chempionlar ligasida “Sabah”ni 2:1 hisobida engdi.
Jamoa so'nggi o'yinlarda yaxshi natijalar qayd etayotgan bo'lsa-da, Germaniya klassikasidagi statistika “Bavariya” foydasiga.
Myunxenliklar 2025 yil oktyabrida raqibini 2:1, 2026 yil fevralida 3:2 hisobida mag'lub etgan. Shu yil avgustdagi Germaniya Superkubogida ham “Bavariya” 2:1 hisobida g'alaba qozondi.
“Borussiya”ning raqibi ustidan so'nggi rasmiy g'alabasi 2024 yil mart oyiga to'g'ri keladi. O'shanda dortmundliklar Myunxenda 2:0 hisobida ustun kelgandi.
Uchrashuv 31 oktyabr kuni, soat 22:30 da start oladi.
