Mavsumni ketma-ket beshta g'alaba bilan boshlagan manchesterliklar “Enfild”ga peshqadam sifatida tashrif buyurmoqda. Mezbonlar esa hali mag'lub bo'lmaganiga qaramay, duranglar sabab raqibidan olti ochko ortda qolgan.
Championat.asia’ning “Hafta o'yini” ruknida markaziy uchrashuv tahlili taqdim etiladi.
Besh o'yin, besh g'alaba. “Siti”ni kim to'xtatadi?
“Manchester Siti” yangi mavsumni deyarli bexato boshladi. Jamoa Premer-ligadagi dastlabki beshta uchrashuvning barchasida g'alaba qozonib, 15 ochko jamg'ardi. Raqiblar darvozasiga 13 ta gol urdi, o'z darvozasidan esa beshta to'p o'tkazib yubordi.
Manchesterliklarning so'nggi natijalari ham raqiblarni ogohlantirishi kerak. Ular Manchester derbisida “Yunayted”ni safarda 1:0 hisobida mag'lub etdi, Angliya Liga kubogida “Norvich”ni 5:0 hisobida engdi. Keyin esa “Sanderlend”ga qarshi bahsda beshta gol urib, 5:3 hisobida g'alaba qozondi.
Biroq aynan “Sanderlend” bilan o'yin “Siti”ning zaif nuqtalarini ham ko'rsatdi. Hujumda beshta gol urish har qanday jamoa uchun yaxshi natija, ammo o'z maydonida uchta gol o'tkazib yuborish himoyada muammolar borligidan darak.
“Liverpul” bunday xatolardan foydalanishga harakat qilishi tabiiy. Ayniqsa, “Enfild”da mezbonlar raqibga bosim o'tkazish va to'pni yo'qotgan zahoti uni qaytarib olishga intilishi mumkin.
“Siti” uchun esa bu uchrashuv mavsum boshidagi g'alabali seriyaning eng jiddiy sinovlaridan biri. Hozirgacha barcha raqiblarini enggan jamoa bu safar “Enfild”da o'z kuchini ko'rsatishi kerak bo'ladi.
“Liverpul” mag'lub bo'lmayapti, ammo ochkolarni yo'qotmoqda
Mersisaydliklarning mavsum boshidagi natijalariga ikki xil qarash mumkin. Bir tomondan, “Liverpul” dastlabki beshta turda biror marta mag'lub bo'lmadi. Ikkinchi tomondan, bor-yo'g'i ikkita g'alaba va uchta durang jamoani yetakchilardan ortda qoldirdi.
Besh o'yinda to'qqiz ochko - chempionlik uchun kurashishni maqsad qilgan klubdan kutiladigan natija emas. Ayniqsa, “Siti”ning birorta ham ochko yo'qotmaganini hisobga olsak.
Shunga qaramay, “Liverpul”ning ijobiy jihatlari ham bor. Jamoa Chempionlar ligasida “Atletiko”ni 2:1 hisobida mag'lub etdi, Angliya Liga kubogida “Tottenxem”dan 3:1 hisobida ustun keldi. Premer-ligada esa “Bornmut” maydonida 1:0 hisobida g'alaba qozondi.
Mersisaydliklarning asosiy muammosi - imkoniyatlarni golga aylantira olmayotgani. Masalan, “Fulxem”ga qarshi bahsda hisob ochilmadi. Mavsumning dastlabki beshta o'yinida ettita gol urish ham hujumda hali o'sish uchun imkoniyat borligini ko'rsatadi.
“Siti”ga qarshi uchrashuv esa vaziyatni o'zgartirish uchun yaxshi imkoniyat. “Liverpul” g'alaba qozonsa, raqib bilan oradagi farqni uch ochkogacha qisqartiradi. Mag'lubiyat esa manchesterliklarni to'qqiz ochko oldinga chiqarib yuboradi.
Albatta, mavsumning bu bosqichida bunday farq hal qiluvchi emas. Ammo chempionlik poygasida raqibni uzoqqa qo'yib yuborish keyinchalik qimmatga tushishi mumkin.
So'nggi uch o'yindagi mag'lubiyatlar. “Liverpul” revansh oladimi?
Bu ikki klubning so'nggi yillardagi raqobati Angliya futboliga alohida qiziqish bag'ishladi. Bir necha mavsum davomida chempionlik taqdiri aynan ular o'rtasidagi kurashda hal qilindi. Biroq o'zaro uchrashuvlarning oxirgi natijalari “Liverpul” foydasiga emas.
“Manchester Siti” raqibiga qarshi so'nggi uchta rasmiy o'yinda g'alaba qozongan. 2025 yil noyabrida manchesterliklar o'z maydonida 3:0 hisobida ustun kelgan bo'lsa, 2026 yil fevralida “Enfild”dan 2:1 hisobidagi g'alaba bilan qaytgan. Aprel oyida Angliya kubogidagi to'qnashuv esa “Liverpul” uchun yanada og'ir kechdi - 0:4.
Demak, mersisaydliklar so'nggi uchta o'zaro bahsda to'qqizta gol o'tkazib yuborgan va faqat bir marta raqib darvozasini ishg'ol qilgan.
Biroq “Enfild”dagi o'yinlarning o'z tarixi bor. “Siti” Premer-liga doirasida bu stadionga qilgan 29 ta tashrifidan faqat uchtasida g'alaba qozongan. Shuning uchun so'nggi natijalar qanchalik manchesterliklar foydasiga bo'lmasin, ularni bu safar ham yaqqol favorit deyish qiyin.
Jarohatlar “Liverpul”ning rejalarini o'zgartirmoqda
Katta o'yin arafasida mersisaydliklar uchun eng yoqimsiz xabarlar hujum chizig'idan keldi.
Aleksandr Isak va Kodi Gakpo “Manchester Siti”ga qarshi maydonga tushmaydi. Ikkala futbolchi ham terma jamoalar ixtiyorida bo'lgan paytda jarohat olgan. Isakning yo'qligi ayniqsa jiddiy yo'qotish: u Premer-ligadagi dastlabki beshta o'yinda to'rtta gol urgan.
Ugo Ekitike ham jarohat sabab uchrashuvni o'tkazib yuboradi. Shu tariqa, “Liverpul” birdaniga bir nechta muhim hujumchisiz qolmoqda.
Bunday vaziyatda Florian Vircning roli ortishi mumkin. U hujum markazidan ortga chekinib, yarim himoyachilar bilan bog'lanishi va qanot futbolchilariga bo'sh hududlar ochib berishi mumkin.
“Siti”da ham yo'qotish bor. Fil Foden diskvalifikaciya tufayli o'ynamaydi. Biroq Erling Holandning safda ekani mehmonlar uchun katta ustunlik. Norvegiyalik hujumchi klublar doirasidagi so'nggi beshta o'yinda ettita gol urgan.
Maydondagi asosiy kurash qayerda kechadi?
“Liverpul” - “Manchester Siti” uchrashuvlarida ko'p narsani maydon markazidagi kurash hal qiladi. Bu safar ham shunday bo'lishi kutilmoqda.
Enco Mareska boshqarayotgan “Siti” to'p nazorati orqali o'yin suratini belgilashga intiladi. Mehmonlar uchun asosiy vazifalardan biri - “Liverpul”ning tezkor hujumlariga yo'l qo'ymaslik. Ayniqsa, to'p yo'qotilganidan keyingi dastlabki soniyalar muhim bo'ladi.
Iraola esa raqibning to'p bilan erkin harakatlanishiga qanchalik to'sqinlik qila olishi haqida o'ylashi kerak. “Liverpul” yuqori pressing orqali “Siti”ni xatoga majburlasa, o'z imkoniyatlariga ega bo'ladi. Ammo buning xavfli tomoni ham bor: himoya ortida qoldirilgan bo'sh hududlardan Holand va uning sheriklari foydalanishi mumkin.
Yana bir muhim jihat - standart vaziyatlar. Katta o'yinlarda bazan bitta burchak to'pi yoki jarima zarbasi butun rejani o'zgartirib yuboradi. Shu bois “Liverpul”ning bu imkoniyatlardan qanchalik samarali foydalanishi ham ahamiyatli.
Maydon tashqarisidagi voqealar ham o'yinga ta’sir qiladimi?
Bu galgi to'qnashuv odatdagidan keskinroq muhitda o'tadi. Yaqinda mustaqil komissiya “Manchester Siti”ni Premer-liganing moliyaviy qoidalarini buzish bilan bog'liq ko'plab ayblovlar bo'yicha aybdor deb topdi. Klub ayblovlarni rad etmoqda va qaror ustidan shikoyat qilgan. Jazo masalasi esa hali hal etilmagan.
Shunday vaziyatda manchesterliklar “Enfild”ga tashrif buyurmoqda. Mareska shogirdlari uchun vazifa faqat kuchli raqibni engish emas, balki maydon tashqarisidagi bosimdan ham uzoqlashib, butun e'tiborni futbolga qaratish bo'ladi.
Umuman olganda har ikki jamoaning o'z maqsadi bor. “Siti” g'alabali seriyani davom ettirib, peshqadamlikni mustahkamlamoqchi. “Liverpul” esa nafaqat uch ochko olish, balki chempionlik poygasida hali jiddiy kuch ekanini ko'rsatish niyatida.
Bir narsa aniq: “Enfild”da oson o'yin bo'lmaydi. Uchrashuv 11 oktyabr kuni Toshkent vaqti bilan soat 20:30 da boshlanadi.
