- Ўйин ҳақида фикрингиз?
- Баҳс дерби мақомига эга бўлгани учун ҳам оғир кечишини билардик. Бугун имкон қадар очиқ ҳудудлар қолдирмасликка ва қанотларни ёпишга ҳаракат қилдик. "Шўртан"да тезкор ўйинчилар бор, уларга ўйин бермасликка интилдик. Рақибни узун паслар билан ўйнашга мажбур қилдик. Ўйин режамиз асосида ўтди. Қарши ҳужумларда фаол бўлиб гол урдик. Бугунги ғалаба футболчиларимиз меҳнати, шу боис йигитларга раҳмат айтаман.
- Адашмасак, жамоангиз 4-ўринга кўтарилиб олди. Бугун олти очколи ўйин кечди деса бўладими?
- Ҳа, шундай дейиш мумкин. Кўряпсиз, бешликка кириш учун ҳамма курашяпти, шу ўринда биз ҳам ҳаракат қиляпмиз.
- Аксар футболчилар "Шўртан"да ўйнаган, қолаверса ўзингиз ҳам биз учун бегона эмассиз. Жамоада ишлаб кетганингиз бугун ёрдам берди ҳисоблайсизми?
- Худди шундай. "Шўртан"даги кўп футболчиларни биламиз. Ўзимиздан ўтган ўйинчилар нимага қодирлигини биламиз. Бу бизга қўл келди. Рақибни ўрганиш қийин кечмади.
- Жамоангизни бугунги кунда мухлислари шаклланганми?
- Мухлисларимиз бор. Секин-аста сон ҳам ортиб бормоқда. Университетда фан-клуб ташкил этилган ва улар ҳам бизни қўллаб туришибди. "Лочин" янги жамоа бўлгани учун ҳаммаси секин-аста бўляпти. Ғалабалар бардавом бўлса, мухлислар кўпайиб боради.
- Замонавий футболда медиа катта планга чиқиб боряпти. Лекин афсуски, "Лочин" медиаси бугунги ўйинни яхши ёритмади. На матнли, на суратлар, на видео - ҳеч нарса чиқмади. Клуб раҳбариятининг медиага бўлган муносабати қандай?
- Матбуот бўлими бизда бор, ҳар бир ўйинимизга келади. Сафар учрашувларига ҳам олиб кетаётгандик. Лекин яқин орада бошқа ишга ўтгани муносабати билан ҳозирча медиа ходимисиз қолдик. Менимча, тез орада бошқа ишчи олсак керак.
