Ҳайвонлар ҳуқуқларини ҳимоя қилиш бўйича дунёдаги энг йирик нодавлат ташкилот PETA ("Ҳайвонлар билан этик муносабатда бўлиш тарафдорлари") "Пэлас" ижрочи директори Шэрон Лейси номига расмий хат юборди.
Хатда Лондон клубидан Феникс лақабли бургутнинг "Селхерст Парк" стадионидаги тадбирларда иштирок этишини тўхтатиш ва бундан буён тирик ҳайвонлардан рамз сифатида фойдаланмаслик мажбуриятини олиш сўралган.
"Кристал Пэлас" 1973 йилда — жамоанинг лақаби "Ойнасозлар"дан "Бургутлар"га ўзгартирилганидан бери ушбу қушлар билан рамзий маънода боғланиб келади. 2010 йилда клуб янги анъанани жорий этган эди: уй ўйинлари олдидан майдонда Кайла лақабли бургут пайдо бўларди. У клубга ўн йил хизмат қилди ва 2020 йилда вафот этди. Унинг ўрнини эгаллаган Феникс лақабли бургут эса 2024 йилнинг август ойида "Вест Хэм"га қарши ўйин олдидан дебют қилди. Феникс Кент графлигидаги Eagle Heights Wildlife Foundation ёввойи табиат фондида сақланади ва у ҳар бир ўйинда ҳам иштирок этмайди. Жорий мавсумда клуб Кайла машҳур бўлган ритуални — ўйин бошланиши олдидан майдон бўйлаб илк парвозни бекор қилди.
PETA ўз хатида ёрқин чироқлар, баланд шовқин ва гавжум мухлислар оломони стадионларни "ҳайвонлар учун нобоп жой"га айлантиришини ҳамда бу ҳайвонларнинг ўзига ҳам, томошабинларга ҳам хавф туғдиришини таъкидлади. Ҳужжатда бургутларнинг деворларга ёки ойналарга урилгани, лочинлардан бири эса мухлиснинг бошига қўниб, эгасининг бош терисига чангалини ботиргани каби ҳолатлар келтирилган. PETA шунингдек, 2015 йилда Кайла билан юз берган инцидентни эслатиб ўтди: Англия лига кубоги доирасидаги трибуналарда тартибсизликлар юз берган ўйинда "Чарльтон" мухлисларидан бири қушга зарба беришга уринган ва кейинчалик айбдор деб топилган эди.
Шунингдек, PETA хатида бургутларнинг табиий хатти-ҳаракатлари хусусиятлари сабабли стадион муҳити улар учун яроқсиз экани қайд этилган. Табиат қўйнида бу қушлар жуда олис масофаларни учиб ўтади ва одатда одамлар билан яқин мулоқотдан қочади. Ташкилот баёнотига кўра, ҳатто тутқунликда ўстирилган қушлар ҳам ўз табиий инстинктларини сақлаб қолади ва табиат томонидан берилган имкониятларни амалга ошира олмаса, стресс ҳамда тушкунликка тушиши мумкин.
"Оқбош бургутлар эркинлик рамзи сифатида эъзозланади, бироқ Фениксдан аслида шунчаки футбол мухлисларини кўнгилочар қилиш учун реквизит сифатида фойдаланилмоқда. "Кристал Пэлас"да томошабинларни жунбушга келтирадиган одам-рамз мавжуд, шу сабабли ёввойи ҳайвонни шовқинли ва тўполончи стадионга судраб келишга ҳеч қандай ҳожат йўқ. PETA клубни Фениксга қанот ёзишига имкон беришга ва уни ўйинлар билан боғлиқ мажбуриятлардан абадий озод қилишга чақиради", — деди PETA'нинг корпоратив лойиҳалар бўйича катта менежери Кэрис Беннетт.
