✅ "Пахтакор" – "Хоразм"
Бизнингча, ҳакам тўғри қарор қабул қилиб, ўйинни давом эттирди. “Пахтакор” футболчисининг қўли табиий ҳолатда эди, танадан узоқлашмаган ва тўп томон қўшимча ҳаракат қилмаган.
✅ "Сўғдиёна" – "Нефтчи"
Мавжуд такрорий лавҳалардан келиб чиқиб, ёрдамчи ҳакамнинг "Нефтчи" голини ҳисобга олиш қарорига ишонишга мажбурмиз. Ёрдамчи ҳакам яхши позицияда эди ва вазиятни қулай ракурсда кўрган бўлиши керак. Фикримизча, тўғри қарор – голни ҳисобга олиш.
✅ "Локомотив" – "Андижон"
Ҳакам ёрдамчисининг ишорасидан сўнг тўғри қарор қабул қилди ва "Локомотив" ўйинчисининг қўл билан ўйнаганини қайд этди. У тўп сари қўли билан ҳаракат қилмоқда, бу жазоланадиган ҳолат. Гол тўғри бекор қилинди.
✅ "Навбаҳор" – "Қизилқум"
Фикримизча, ушбу вазиятда ҳакамнинг ўйиинни давом эттириш қарори – тўғри. Мутлақо нормал яккакураш содир этилган. Тўғри, "Навбаҳор" ўйинчиси рақибини туртиб, уни тўпдан "сиқиб чиқармоқда", аммо ушбу контакт йиқилиш ва пенальти белгилаш учун етарли эмас деб ҳисоблаймиз.
✅ "Навбаҳор" – "Қизилқум"
Ҳакам ёрдамчиси тўғри қарор қабул қилиб, "Қизилқум" футболчиси ўйиндан ташқари ҳолатда қолганини қайд этди. Шеригидан тўп узатилган вақтда у офсайд чизиғидан ўтиб кетган эди.
✅ "Навбаҳор" – "Қизилқум"
"Навбаҳор" ўйинчиси тўпни ўзидан олдинга ташлади, "Қизилқум" ҳимоячиси эса тўпга ўйнашга улгурди. Шундан сўнг футболчилар ўртасида нормал контакт юз бермоқда. Бизнингча, тўғри қарор – ўйинни давом эттириш.
✅ "Сурхон" – "Динамо"
Ушбу вазиятда "Динамо" футболчиси тўғри ҳолатда эди. Ҳакам ёрдамчиси вазиятни тўғри баҳолаб, ўйинни давом эттирди. Гол қоидага мувофиқ урилган.
❌ "Сурхон" – "Динамо"
Бизнингча, бу вазиятда ҳакам “Сурхон” ҳужумчисига сариқ карточка кўрсатмай, хатога йўл қўйди. Ҳужумчи ўйламай ҳаракат қилиб, дарвозабон учун юзага келиши мумкин бўлган оқибатларни инобатга олмаган ҳолда курашга киришди. Назаримизда, бу вазиятда жарима зарбаси белгилаш ва қўпол ўйин учун огоҳлантириш бериш тўғри қарор бўларди.
❌✅ "Сурхон" – "Динамо"
Бизнингча, ҳакам бу қоидабузарлик учун “Динамо” ўйинчисига сариқ карточка кўрсатиб хато қилди. ВАР вазиятга тўғри аралашиб, ҳакамни эпизодни такроран кўриш учун монитор олдига чақирди. Тўғри қарор – қоиданинг жиддий бузилгани учун қизил карточка, зеро бутсанинг таги билан ўйналган, зарба юқорига йўналтирилган, босим билан ҳаракат қилинган ва жароҳат етказиш хавфи мавжуд бўлган.
Шу тариқа, Суперлиганинг 13-тури доирасидаги ўйинларда ҳакамлар иккита хатога йўл қўйишди. Уларнинг ҳар иккиси "Сурхон" – "Динамо" учрашувига тўғри келди, улардан бирини ВАР кўригидан сўнг тузатишга эришилди.
