Брендан Рожерс:
Албатта, биз ушбу ўйинни интиқлик билан кутяпмиз. Мусобақани яхши бошладик ва энди илк сафар учрашувимизни ўтказамиз. Биз яхши футбол ўйнайдиган, техник жиҳатдан кучли футболчиларга эга жамоага қарши майдонга тушамиз, шунинг учун яхши натижага эришиш учун бор кучимизни ишга солишимиз керак. Жума куни ички чемпионатимизни ажойиб тарзда қайта бошладик ва бу ўйинда ҳам шундай руҳиятни сақлаб қолмоқчимиз.
Юлиан Вайгл:
Бу ерда эканлигимдан жуда хурсандман. Ўтган мавсумда ушбу мусобақада иштирок этиш учун қаттиқ меҳнат қилган эдик. Биринчи ўйинда яхши натижага эришдик ва эртанги баҳсга ҳам катта умидлар билан қараяпмиз. Мақсадимиз – чиройли ўйин кўрсатиб, ўзимиз учун ижобий натижа қайд этиш.
Саволим бош мураббийга. Ўтган ўйиндан кейинги икки кун ичида ушбу баҳсга қандай тайёргарлик кўрдингиз?
Брендан Рожерс:
Ҳозир мавсумнинг жуда тиғиз палласидамиз. Жума оқшомида катта куч сарфладик ва яхши натижага эришдик. Ҳозирда энг асосийси – футболчиларнинг жисмоний тикланишини таъминлаш. Биз қарийб бир йилдан бери бирга ишлаяпмиз ва ўйинимизнинг асосий тамойилларини яхши тушунамиз. Тайёргарлигимиз асосан жисмоний тикланиш ва эртанги ўйинга руҳий томондан тайёр бўлишга қаратилган.
"Пахтакор" биринчи турда Жиддада "Ал Аҳли"га қарши яхши ҳаракат қилди. Ўша учрашувни таҳлил қилган бўлсангиз, "Пахтакор"нинг энг кучли жиҳати қайси деб ўйлайсиз?
Брендан Рожерс:
Бу "Пахтакор" учун жуда яхши натижа бўлди. Улар ажойиб гол уришди ва комбинацион ўйин кўрсатишди. Биз бу даражадаги ҳар бир рақибни ҳурмат қиламиз. Улар ҳам ўз ички чемпионатида ғалаба қозонишга одатланган кучли жамоа ҳисобланади. Уларнинг ўйинини кузатдим: тўпни назорат қилишни яхши кўришади, ярим ҳимоячилар ўринларини тез-тез алмаштириб туришади ва ҳужумнинг сўнгги қисмида жарима майдончасига узатмалар амалга оширишади. Шунинг учун ҳам улар ўз лигасида муваффақиятли иштирок этишмоқда. Бироқ биз кўпроқ ўз ўйинимизга эътибор қаратганмиз ва рақибни ҳурмат қилган ҳолда уларга имкон қадар муаммо туғдиришга ҳаракат қиламиз.
Саволим футболчига. Мухлисларингизга қандай мурожаатингиз бор ва эртанги ўйиндаги мақсадингиз қандай?
Юлиан Вайгл:
Умид қиламанки, уларнинг барчаси бизни телевизор орқали кузатиб, қўллаб-қувватлаб туришади. Албатта, биз ўз майдонимизда мухлислар қаршисида ўйнашни яхши кўрамиз, лекин узоқ сафарларга чиқиш ҳам ушбу мусобақанинг ажралмас бир қисмидир. Эртанги мақсадимиз – чиройли ўйин кўрсатиш. Агар биз бор қобилиятимизни ишга солиб, қаттиқ меҳнат қилсак ва рақибни ҳурмат қилсак, ижобий натижа қайд этишимизга ишончим комил.
Саволим футболчига. Сиз Томас Тухель ва Люсьен Фавр каби элита даражасидаги мураббийлар қўл остида шуғуллангансиз. Ҳозир эса Брендан Рожерс билан ишлаяпсиз. Брендан Рожерс аввалги мураббийлардан нимаси билан фарқ қилади ва сиздан кўпроқ нимани талаб қилади?
Юлиан Вайгл:
Фаолиятим давомида кўплаб яхши мураббийлар билан ишлаш насиб қилганидан ўзимни омадли деб биламан. Масалан, Томас Тухель мени юқори даражага олиб чиққан мураббий ҳисобланади. Мен уларнинг ҳар биридан кўп нарсаларни ўрганганман. Брендан Рожерс жамоага келганидан бери менга катта ишонч бағишлади. Унинг қўл остида ўзимни жамоа учун муҳим ўйинчидек ҳис қиляпман ва бунинг учун ундан миннатдорман.
Сўнгги ўйинда жамоангиз 5:0 ҳисобида ғалаба қозонди ва голларни беш хил футболчи киритди. Сизнинг мураббийлик фалсафангиз асосан жамоавий ўйинга қурилганми ёки кўпроқ индивидуал маҳорат эгаларига таянасизми?
Брендан Рожерс:
Менинг жамоаларим доимо ҳужумкор ва агрессив тарзда, прессингга асосланган ўйин кўрсатиб келган. Бундай ўйин услубида гол уриш масъулияти бутун жамоага тенг тақсимланади. Албатта, биз жамоадаги юқори иқтидор эгаларига ҳам таянамиз, лекин энг асосийси – бу жамоавий тузилмадир. Бизнинг мақсадимиз ҳар бир ўйинда тўлиқ таркиб билан ғалаба қозониш учун ҳаракат қилишдир. Менинг фалсафам шундан иборатки, индивидуал футболчилар мустаҳкам ва тўғри қурилган жамоавий тузилма ичида янада яхшироқ ўсишга эришади.
