26-turning eng yaxshi darvozaboni - Umidjon Ergashev (“Xorazm”)
"Xorazm" bu turda "Paxtakor"ga kichik hisobda (0:1) imkoniyatni boy berdi. Shunga qaramay, bahs davomida jamoasini qator vaziyatlarda qutqarib qolgan va naqd 8 ta seyv ko'rsatgan xorazmliklar posboni tur darvozaboni deb topildi.
26-turning eng yaxshi murabbiyi - Mirjalol Qosimov (OKMK)
OKMK bu turda “Lokomotiv” mehmoni bo'lib, irodali jamoa ekanligini yana bir bor ko'rsatdi va 2:1 hisobida g'alaba qozondi. Ularning ikkinchi goli 90-daqiqada urilgani bunga dalil bo'lib turibdi. Olmaliqliklar bahs davomida murabbiy ko'rsatmalarini aniq bajarib, mazmunli o'yin namoyish etishdi. Shu bois OKMK ustozi Mirjalol Qosimov haqli ravishda tur murabbiyi deb topildi.
26-turning eng yaxshi futbolchisi - Anvar Hojimirzaev (“Dinamo”)
“Dinamo” bu turda G'uzorda “Mashal”ni yirok hisobda taslim qildi (3:0). Uchrashuvda samarqandliklar hujumchisi Anvar Hojimirzaev jamoaning haqiqiy lideri ekanligini isbotlab, 1 ta gol urdi va 1 ta golga assistentlik qildi. Shunday qilib, aynan u tur futbolchisi nomiga loyiq ko'rildi.
26-turning eng chiroyli goli muallifi - Muhammadbobur Karimov (“Paxtakor”)
“Xorazm”ga qarshi o'yinda yagona golni “Paxtakor” himoyachisi Muhammadbobur Karimov urdi (1:0). 20 yoshli futbolchi 89-daqiqada o'zining kuchli zarbasi orqali darvoza pastki burchagini poyladi, bu golni maydondagi futbolchilar shunchaki tomosha qildi. Aynan shu gol turdagi eng chiroylisi sifatida etirof etildi.
