– Шу ердаги ҳиссиётларни тасвирлаб берсангиз. Сиз ва жамоадошларингиз томонидан қандай ажойиб ўйин намойиш этилди! Плей-офф босқичига илк бор йўлланма олдингиз ва кейинги рақиб – Англия. Бу ҳақда нима дейсиз?
– Ҳа, жуда ажойиб ўйин бўлди. Биз учрашувни жуда ёмон, ўта бўш тарзда бошладик. Ўйлайманки, бунга елкаларимиздаги масъулият юки сабаб бўлди. Аммо гол ўтказиб юборганимиздан сўнг хотиржамликни сақлашга ва бошни баланд кўтаришга муваффақ бўлдик. Танаффусда мураббий майдондаги жойлашувимизга баъзи ўзгартиришлар киритди. Менимча, бизда яна гол уриш учун жуда кўп вазиятлар бўлди. Пенальти эса айни вақтида белгиланди. Биласизми, пенальти тепаётганда гол уриш шарт, айниқса, бундай паллада бу осон эмас. Пенальтидан гол урганимда ва иккинчи голни киритганимизда, ғалаба қозонишимизни англагандим. Учинчи голни ҳам урдим, бундан жуда фахрланаман. Бугун тунда ушбу ғалабадан роҳат олишга ҳаракат қиламиз. Тўғри, кейинги рақибимиз – Англия. Мутлақо бошқача, яъни топ-рақибга қарши жуда қийин ўйин бўлади. Бироқ бундай ўйинлардан завқ олиш керак. Биз дунёнинг энг кучли жамоаларидан бири бўлган Англияга қарши ўйнашга ҳақлимиз. Шунинг учун олдинда кутаётган учрашувни интиқлик билан кутяпман.
– Сўнгги ҳуштак янграганидан сўнг баъзи ўйинчилар тизза чўкканини, мураббийлар эса майдон бўйлаб рақсга тушганини кўрдим. Бу ғалаба Конго халқи учун нимани англатади?
– Бу шуни англатадики... биз жаҳон чемпионатида эндигина иккинчи бор иштирок этяпмиз. 52 йилдан сўнг! Жаҳон чемпионатига саралаш босқичини 4 йил олдин бошлаганмиз. Мана шу таркиб билан Нигерия ва Камерунга қарши плей-офф босқичларигача бордик, Ямайкага қарши ўтиш ўйинида майдонга тушдик. Мусобақани Португалияга қарши ўйин билан бошлаб, дуранг қайд этдик. Колумбияга ютқаздик. Ўйиннинг 5-дақиқасидаёқ 1:0 ҳисобида ортда бораётган эдик... Ҳа, бу нафақат футболда, балки ҳаётда ҳам ҳеч нарса осон эмаслигини кўрсатади. Биз шунчаки матонат кўрсатишимиз керак. Бундай дамлар келганда эса, ундан завқланиш лозим, чунки бу осонликча келмайди. Бу қувонч барчамиз учун мана шуни англатади.
– Биринчи бўлим сизлар хоҳлагандек ўтмаганини таъкидладингиз. Танаффусда тактик ўзгаришлардан ташқари, мураббий томонидан қўшимча мотивация бериш учун бирон сўз айтилдими?
– Биласизми, мураббий бизни жуда яхши билади. У шунчаки яримҳимоячи ва қанот ўйинчиларининг жойлашувини ўзгартирди. У кўп нарсани ўзгартирди, менга эса ҳимоячилар ортига югуриш ва орқага қайтиш учун эркинроқ рол берди. Айниқса, кўпроқ узатмаларни амалга оширишни сўради. Чунки иккита ҳужумчи билан ўйнаганимизда бизга узатмалар керак бўларди. Пенальти ҳам айнан шундан юзага келди. Мураббий тўғри қарор қабул қилди ва бунинг учун қойил қолишимиз керак.
– Сизнинг ғалабангиз ва Африка жамоаларининг ушбу жаҳон чемпионатида кўрсатаётган таъсирини ҳисобга олсак, бу ҳаракатлар Африка футболининг ҳозирги даражаси ҳақида нимани англатади?
– Ўйлайманки, бу жуда яхши. Бу Африка жамоалари ҳам улкан мақсадларни кўзлай олишини кўрсатмоқда. Биласиз, ўтган жаҳон чемпионатида Марокаш ярим финалгача етиб бориб, буни исботлади. Ўйлашимча, ҳозир 8 та жамоамиз бор, умид қиламанки, бугун тунда улар 1/16 финалдан ўтади. Шундай экан, биз тайёр туришимиз керак, чунки олдинда кутаётган воқеалар Африка жамоалари учун яхши ҳолат. Ҳозир ёш футболчилар эртароқ етишиб чиқаётганини кўряпмиз. Буни Садики, Мукау ҳамда Натан Мбуку мисолида ўз жамоамизда ҳам кўрсатяпмиз. Бу жуда яхши ва бу федерациямиз улкан орзулар қила олишидан далолат беради.
– Бу ерда, Атлантада жуда кўп конголиклар яшайди. Уларнинг аксарияти сизлар билан бир шаҳарда бўлишнинг ўзи бахт эканлигини айтишди. Бугунги ўйинга кела олмаган, лекин барибир сиз ва жамоангизга ҳавас билан қарайдиган ўша оилаларга қандай мурожаатингиз бор?
– Уларга айтар сўзим: раҳмат! Биласизми, чиндан ҳам раҳмат дейман, чунки биз қаерга бормайлик, у ерда конголиклар бор. Биз ғурурли мамлакат, ғурурли халқмиз. Мамлакатимизни, миллий терма жамоамизни ва ўзимиз тақдим этаётган нарсани севамиз. Ўйлайманки, биз бугун қандай вазият бўлишидан қатъи назар, фақат курашиш учун майдонга тушганимизни кўрсата олдик. Биласиз, мамлакатимизда вазият осон эмас, Шарқий Конгода уруш кетмоқда ва ҳар сафар бу либосни кийганимизда, улар ҳақида ўйлаймиз. Шунинг учун бугунги ўйинимиз орқали халқимизга: "Йигитлар, нима бўлишидан қатъи назар, олдинга интилишимиз керак", – демоқчимиз. Чунки биз тинчлик истаймиз. Уларга шунчаки раҳмат айтмоқчиман. Раҳмат, чунки биз бу ергача узоқ йўл босиб келдик. Йўқдан бор бўлиб, шу ерга етиб келдик. Энди ўз тарихимизни зарҳал ҳарфлар билан ёзяпмиз ва бундан фахрланишимиз керак. Бугун бизни қўллаб-қувватлаган барча конголикларга катта раҳмат. Айниқса, ватанда тунги соат 2 гача ухламай, фақат шу ўйинни кутган инсонларга раҳмат. Улар биздан фахрланишларини истайман ва уларга ҳам раҳмат айтаман.
– "Ньюкасл"даги мавсум сиз учун қийин ўтди, баъзи жароҳатлар ва спорт формангизда пасайиш кузатилди. Жаҳон чемпионатида иштирок этиб, ўзингизнинг энг яхши ҳолатингиз ва нималарга қодирлигингизни кўрсатиш қандай туйғу?
– Ўйлайманки, бу тўғри гап. Шунинг учун ҳам мен бу кийиниш хонасидаги ҳаммадан кўра кўпроқ фахрланаман. Чунки мен учун жуда қийин ёз бўлди, жиддий жароҳатни бошдан кечирдим. Биласизми, эртароқ қайтишни, поездга улгуришни хоҳлайсиз... бу унчалик яхши фикр эмас экан. Шунинг учун мен "Ньюкасл"да ўзимнинг энг яхши ўйинимни кўрсата олмадим, лекин вақтим келишини билардим. Ва ўша вақт ҳозир келди. Мен шунчаки ҳозир ҳаммага яхши ҳолатда эканимни кўрсатдим. Жисмоний ва руҳий томондан ўзимни яхши ҳис қиляпман. Шунинг учун бугун яхши футболчи эканимни исботлаганимдан фахрланаман. Мен футбол ўйнашни биламан ва айниқса, жисмоний ҳолатим яхши бўлганда, миям хотиржам бўлади ва қолгани ўз-ўзидан ўхшайди. Шунинг учун бугун жуда ғурурланяпман.
– Бугун сиз учрашувнинг энг яхши ўйинчиси бўлдингиз, иккита гол урдингиз. Сиз яхши футболчисиз, лекин бу ўйинда энг яхшиси бўлдингиз. Бугун сиз жамоа етакчисисиз. Ушбу янги позицияда жамоадошларингизга нима бера оляпсиз?
– Бу жамоага нима беряпман? Жуда катта ишонч беряпман... Мен бу масъулият юкини ўз елкамга олишга ҳаракат қиляпман. Жамоадошларим эркинроқ ҳаракат қилиши учун елкамга катта юк оляпман. Ҳозир етакчилик ролини қабул қилганман, чунки бугун мен етакчиман ва Конго терма жамоаси етакчиси эканлигимдан фахрланаман. Бироқ бу ролни шунчаки мақтаниш учун эмас, балки жамоани, атрофимдаги футболчиларни кучайтириш учун олганман. Ўйлайманки, бугун буни қойилмақом тарзда уддаладим ва терма жамоа сафига қўшилганимдан бери шунга интилиб келяпман. Шунинг учун бугун ўзим ва жамоадошларим қилган ишдан жуда фахрланаман. Чунки биринчи марта терма жамоага чақирилган Тео Бонгонда, жаҳон чемпионатида илк бор ўйнаётган Мешак Элия ва Фистон Майеле кабиларни кўрганимизда, бу жамоамизнинг қиёфасини кўрсатади. Бу барчамиз бир-биримизга кераклигимизни англатади. Шунинг учун, нима бўлишидан қатъи назар, уларни рағбатлантиришга, қийин дамларда уларга озгина табассум улашишга ва энг асосийси, оғир дамларда улар учун шу ерда эканимни тушунтиришга ҳаракат қиламан. Улар буни кўришди ва эришган натижамиздан мамнунман. Энди эса олдинда бизни узоқ йўл, катта йиртқичлар – "шерлар" кутмоқда, аммо биз – "қоплонлар" бунга қандай жавоб қайтаришни яхши биламиз.
