“Янгиер”нинг ғалаба қозонишига мухлислар етишмади...ми?

Ушбу тур доирасида Янгиер шаҳрининг “Янгиер” жамоаси Ғаллаоролнинг “Ғаллакор-Барса” клубини қабул қилди. Учрашув 1:1 ҳисобидаги дуранг натижа билан якунтопди. Ҳозир ўйин ҳақида эмас, балки учрашув атрофида юз берган ҳолатга эътибор қаратмоқчимиз.

Шу куни “Янгиер” стадионига мухлислар киритилмади. Бунга сабаб сифатида фавқулотда вазиятлар ходимлари стадионнинг ғарбий трибунасининг 2-қавати талабга жавоб бермайди, деб ҳисоблашган. ЎзПФЛ сайтида эълон қилинган қайдномада ёзилишича, “Янгиер” – “Ғаллакор-Барса” баҳсига 76 нафар томошабин ташриф буюрган. Ушбу рақамда акс эттирилган мухлислар сони жамоалар аъзолари, стадион ишчи ходимлари ва тартиб посбонлари вакилларини ташкил этган бўлса керак. Бироқ стадион ташқарисида йиғилган 3-4 минг мухлис учрашувни кўролмай, кўчада туриб-туриб, кутиб-кутиб кўнгиллари хира холда уйларига тарқашди.

Хайрон қоласан киши, мухлисларсиз футбол кимга керак? Ахир “Янгиер” стадионининг бир қаватдан иборат шарқий трибунаси тўлиқ тайёр эдику! Балки севимли жамоамизнинг ғалаба қозонишига, биз – мухлисларнинг далдаси етишмагандир...

Умид қиламизки, 16 апрель санасида ўтказиладиган “Янгиер” – “Зомин” учрашувигача муаммолар барталаф этилиб, “Янгиер” стадионига мухлислар ташрифи таъминланади.

Нодир Тоштемиров,
Янгиер шаҳридан