У иккинчи бўлим бошида, Сон Хён Миннинг голидан сўнг ҳисоб 1:0 бўлиб турганда майдонга тушиб, 60-дақиқада О Се Хун томонидан киритилган иккинчи гол комбинациясини бошлаб берган эди.
Ўйиндан сўнг у кийиниш хонасига кириб, сўнгра 1996 йилда туғилган тенгдошлари – Хван Хи Чан ва ўйинда қатнашмаган Ким Мин Жэ билан биргаликда майдонга қайтди ҳамда терма жамоа либосида эсдалик учун суратга тушди. Айнан мана шу кутилмаган ҳолат футболчиларнинг миллий жамоадаги фаолиятини бирданига якунлаши ҳақидаги шов-шувли миш-мишларни келтириб чиқарган эди.
Вазиятга ойдинлик киритиш мақсадида журналистлар олдига чиққан Хван Ин Бом бу гап-сўзларни қисман рад этди. У ўтган Жаҳон чемпионатидан буён кутилган натижалар бўлмаётганидан руҳан қийналганини, қолаверса, йиғинга келишда оёғида муаммо кузатилиб, дастлабки икки ўйинда майдонга туша олмагани учун кўнгли тўлмаганини таъкидлади. Хван тенгдошлари билан бўлган суҳбат ҳақида шундай деди: "Бугунги ўйиндан олдин йигитлар билан 'келинглар, бор кучимизни бериб, ёшларга ниманидир кўрсатиб қўяйлик' – деб келишиб олган эдик. Ёш футболчиларнинг ўзлари яхши кўрган футболни майдонда эркин ўйнаганини кўриш жуда ёқимли бўлди".
Шунингдек, у ўйиндан кейинги ҳиссиётлари ва терма жамоадан кетиш масаласига ҳам тўхталиб ўтиб, дарҳол кетиш нияти йўқлигини билдирди: "Терма жамоага келганимда, ҳар доим 'бу менинг сўнгги ўйиним бўлиши мумкин' – деган хаёлга бораман. Бугун шу ҳиссиётлар кучайиб, кўзимга ёш келди. Ноябрь ойидаги йиғинга чақириш – бош мураббийнинг қарори. Мен доим фаолиятимни якунлашга тайёргарлик кўриб юраман. Вақтида кета олиш ҳам доноликдир. Ёшим ўтгани сайин йиғлоқи бўлиб қоляпман шекилли".
