ОКМК жамоаси мураббийи Хайрулла Каримов Суперлига қуръаси натижалари ҳақида ўз фикрларини билдирди.
Мутахассиснинг таъкидлашича, қуръа натижаларига кўра барча жамоалар бир-бири билан тўқнаш келади ва шу боис рақиб танлови катта аҳамият касб этмайди.
"Суперлигада қуръа шундай тушдики, барча жамоалар бир-бири билан ўйнайди. Шунинг учун ким билан ўйнаш унчалик катта аҳамиятга эга эмас, деб ўйлайман. Ҳа, чемпионатни уйдаги ўйин билан бошлаш бироз енгиллик бериши мумкин", — деди Каримов.
Шунингдек, мураббий мавсумнинг дастлабки турларида жамоалар ўртасида катта фарқ бўлмаслигини қайд этди.
"Менинг ўйлашимча, чемпионатнинг бошидаги 4–5 турда барча жамоалар деярли бир хил ҳолатда бўлади. Қолаверса, ҳозирги Суперлигада кучсиз жамоанинг ўзи йўқ. Шунинг учун бу йилги чемпионат жуда қизиқ ўтишига умид қиламан", — дея қўшимча қилди мураббий.
