- Ўйин ҳақида фикрингиз?
- Баҳс оғир кечишини билардик, рақиб бизга жиддий қаршилик кўрсатди. Муаммоларимиз бор, бир нечта футболчимиз йўқлиги ўзини билинтиряпти. Йигитларга алоҳида раҳмат, қийин ўйинда ғалаба қозона олдик. Иккинчи таймда устунлик биз томонда бўлди, гол урдик ва ғалаба қозондик.
- Жамоага Ҳожимирзаев билан айниқса бугун Абдураҳмонов етишмади. Абдураҳмонов борасида терма жамоа билан келишса бўлмасмиди: терма жамоа ундан фақат расмий ўйинларда фойдаланса, масалан, бугун Хитойга қарши ўртоқлик учрашувида бу футболчи захирада қолди.
- Бу ҳақда бир нарса дейиш қийин, чунки терма жамоа учун таркибни терма жамоа мураббийи белгилайди. Айтганимдек, бизнинг ишимиз терма жамоага футболчи тайёрлаб бериш. Масалан, бугун уни туширишганида ва футболчи жароҳат олса нима бўларди. Мен буни ҳам тушунаман. Ўз пайтида ўзим ҳам терма жамоада ишлаганман ва вазиятни жуда яхши тушуняпман. Шуни айтишим мумкин, Абдураҳмонов сафимизда бўлганида бизга анча осон бўларди.
- Стадион маъмурияти нима учун "Динамо"га машғулот ўтказиши учун майдонни бермаяпти? Буни қандай изоҳлайсиз?
- Бермаяпти десак бироз нотўғри бўлади. Ўзимиз сўрамаяпмиз десак бўлади. Чунки майдон ҳолатини асрашимиз керак. "Нефтчи" келганида ярим соат машғулот ўтказиб, жарима майдончаси ичини ёмон кўринишга келтирди ва бу ҳалиям сезилиб турибди. Ўйин пайти кўряпсиз, футболчилар югурганида майса отлиқиб кетяпти. Энди фараз қилинг, доим машғулот ўтказсак қай ҳолатга келиб қолади. Майдонимиз юмшоқ ва асрашга ҳаракат қиляпмиз. Энди яқинда бу ерда тўй бўлганига келсак, буни изоҳлай олмайман. Олдинлари "Крокодил" деган журнал бўларди, ҳозир эса йўқ, балки кейинчалик яна чоп этилар. Тўй бўладиган ресторанга биз кириб футбол ўйнасак қандай кўринади.
- Бугун стадионга уч мингдан зал кўпроқ мухлис келганини айтишди.
- Мен ҳам шунга ҳайрон қолдим. Ваҳоланки, стадионимиз катта, менимча кўпроқ одам келди. Қанча чипта сотилганини билмайман, балки кўпчилик бепул киргандир. Мен аниғини билмайман, билганим шуки, стадион клубга тегишли эмас, биз ижара асосида фойдаланамиз.
- "Навбаҳор" билан ўйингача жароҳат олганлардан кимдир сафга қайтадими?
- Ҳозирча бир нима дея олмайман. Биз фақат умид қиламиз.
- Иккинчи таймда жамоангиз ўйини кучайди. Захирадан тушган икки футболчи ўйинни кучайтирди. Тўхтасинов яхши футболчи эканини биламиз, уни асосий таркибда туширса бўлмасмиди? У биринчи таймда ҳам шундай ўйнаши мумкин эди.
- Тўхтасинов жароҳат билан тўп тепяпти, унинг жароҳати тўлиқ куч билан ҳаракат қилиш имконини бермаяпти. Уни жароҳат уч ойдан бери безовта қиляпти. Иккинчи бўлимда баъзи футболчилар жойини ўзгартирдик, тўпни назорат қилишга ўтдик, бу фойдамизга ишлади.
- Тигран Аванесян асосий таркибда тушди ва биринчи таймдан кейиноқ алмаштирилди. Бу нима билан боғлиқ?
- У ўйнаган чизиқда фаоллик юқори бўлиши керак эди. Тигран бироз сокин ўйинчи. Шуни ҳисобга олган ҳолда уни алмаштирдик. Легионер ўйинчимиз мослашув жараёнини бошдан кечиряпти. Ундан умидимиз катта.
- Аксар футболчиларда жароҳат бор, етакчилар доим бир текис ўйнай олмаяпти. Наманганда қийин бўлади деб ўйлайсизми?
- Наманганга тўлиқ таркиб билан борсак ҳам қийин бўлади. Тайёргарлик кўрамиз, ўзимизни кўрсатишга ҳаракат қиламиз. Менда ҳаяжон йўқ, ҳамма билан ўйнаймиз.
- Ўрозов ҳақида фикрингиз қандай? Унинг йўқлиги билинмаяптими?
- Ўрозов яхши футболчи, унинг йўқлиги барибир билинади. Биз мавсум бошида кўп очко йўқотдик, ҳозир медаллар учун курашамиз деб баралла гапира олмаймиз. Ўрозовни ёрқин келажак кутмоқда деб ўйлайман. У Россияда ўзбек футболини намоён этмоқда, унга омад тилайман. Унинг ортидан бошқалар ҳам эргашса, бу футболимиз учун фойдалаи бўлади. Ўйлашимча, Ўрозов янги жамоасида яхши ҳаракат қиляпти, ҳали у ҳақда ёмон фикр эшитмадим.
- Билишимизча, Ўрозов "Рубин"га ижара асосида кетган. Уни "Рубин" тўлиқ сотиб олиши мумкинми?
- Ҳаммаси ўзига боғлиқ. Уни дастлаб Англияга, кейин Ирландияга кетади дейишди. Бу орада "Рубин"дан жиддий таклиф тушди ва футболчини яхши ўйнаб кетса сотиб олиш шарти билан ижарага бердик. Агар "Рубин" тўлиқ сотиб олишни хоҳласа, биз бунга қарши бўлмаймиз.
