Улуғбек Мирзаев: "Қуръа нисбатан қулай тушди, аммо бу ҳолат бизни хотиржамликка етакламаслиги шарт"

Таркибини қатор тажрибали футболчилар ва легионерлар билан кучайтирган жамоа янги мавсумга кўтаринки руҳда тайёргарлик кўрмоқда. Қуръа натижалари ва жамоадаги жараёнлар ҳақида "Металлург" бош директори Улуғбек Мирзаев фикр билдирди.

— 2026 йилда Про лигада жамоалар сони оширилгани ҳақида нима дейиш мумкин?

— Ростини айтсам, фаолиятим давомида турли жамоаларда ҳар хил лавозимларда ишлаган бўлсам-да, Про лигада илк бор иштирок этишим мен учун қизиқ. Шу пайтгача фақат Суперлига миқёсидаги мусобақаларда қатнашгандим. Таъкидлаш жоиз, ЎзПФЛ Про лигада катта ислоҳотларни амалга оширди. Ўтган мавсум иштирокчилар сони атиги 6 тани ташкил этган бўлса, 2026 йилда бу кўрсаткич икки баробардан кўп 14 тага етказилди. Бу — олдинга қўйилган жиддий қадам. Лигани ривожлантириш йўлида муҳим юриш бўлди. Янги мавсумнинг энг эътиборга молик жиҳати ҳам айнан иштирокчилар сонининг кескин ошганида, деб ҳисоблайман.

— Қуръа "Металлург" учун қай даражада қулай келди?

— Сир эмас, жамоамиз бу йилги мусобақанинг асосий фаворитларидан бири сифатида тилга олинмоқда. "Металлург" 1998 йилдан 2024 йилгача, яъни 27 йил давомида мунтазам равишда кучлилар сафида иштирок этди. Бекободда доим рақобатбардош яхши жамоа бўлган. Жорий мавсумда ҳам мақсад аниқ — биринчи ўринни эгаллаб, Суперлигага тўғридан-тўғри йўлланмани қўлга киритиш.

Тақвимга кўра, 13 та учрашувни ўз майдонимизда, 13 тасини сафарда ўтказамиз. Қуръа натижалари нисбатан қулай тушди, дейиш мумкин. Мавсумни анча енгилроқ рақиблар билан бошлаймиз. Бироқ бу ҳолат ортиқча эҳтирос, хотиржамликка сабаб бўлмаслиги лозим. Оёғимиз ердан узилмаслиги керак. Майдонга тушиб, ҳакамнинг сўнгги хуштаги янграганидан кейингина таблога қараб натижа ҳақида гапириш мумкин. Учрашув бошланмасидан туриб ғалаба ҳақида ўйлаш нотўғри. Ҳар бир рақибга ҳурмат билан жиддий ёндашишимиз шарт. Ҳар бир очкони олтинга тенг баҳолаб, турнир жадвалидаги мавқеимизни мустаҳкамлаб олсакгина старт яхши келди дея оламиз. Акс ҳолда, бу яхши оқибатларга олиб келмаслигини ҳис қилишимиз керак.

— Трансфер ойнаси якунланиши арафасида. Селекция ишлари ниҳоясига етдими?

— Таркибни шакллантириш жараёни деярли якунига етди. Регламентга кўра, рўйхатдан 25 нафар футболчи ўтказиш мумкин.  Тўрт нафари легионерни жалб қилдик. Бразилиялик ҳужумчи Максуэл билан шартнома туздик. Шунингдек, Хитой Суперлигасидан келган Бранимир Йочич сафимизни тўлдирди. Қолган икки легионер мухлисларга яхши таниш: Ўзбекистонда тўққизинчи мавсумини, бешинчи жамоасида ўтказадиган марказий ҳимоячи Владимир Бубаня ҳамда 2023–2024 йилларда "Андижон" шарафини ҳимоя қилган Армин Бошняк билан келишувга эришдик.

Қолганлар маҳаллий, катта тажрибага эга футболчилар. Уларнинг аксарияти Суперлигада бир неча йил тўп тепган. Умид қиламизки, айнан шу омил қийин паллаларда жамоага таянч бўлади. Қолганига вақт баҳо беради. 26 январдан буён Тошкентда машғулот ўтказмоқдамиз. 9 мартдан эса жамоа Бекободдаги доимий спорт базасида тайёргарликни давом эттиради.