U-23 Осиё Кубоги давом этади: бугун финалчилар аниқланади

20 январь. 16:30

ЯПОНИЯ - ЖАНУБИЙ КОРЕЯ

Жидда. King Abdullah Sports City Hall Stadium

Япония U-23 терма жамоаси ушбу мусобақада қаторасига тўртта ўйинда ғалаба қозонди. Кунчиқар юрт вакиллари гуруҳда Сурияни 5:0, БАА 3:0, Қатарни 2:0 ҳисобида мағлуб этиб, 100 фоизли натижа кўрсатишди. Қизиғи, японлар биронта гол ўтказишмади. Кейинчалик чорак финал ўйинида Иорданияга қарши майдонга тушган Япония 1:1 ҳисобини қайд этди ва пенальтилар сериясида 4:2 ҳисобида зафар қучиб, ярим финалга етиб келди.

Жанубий Корея U-23 терма жамоаси биласиз, биз билан битта гуруҳда эди. Биз гуруҳда уларни 2:0 ҳисобида ютдик, лекин чорак финалда омадимиз келмади. Хитой билан кечган ўйиннинг пенальтилар сериясида имкониятни бой бердик. Кореяликлар эса чорак финални Австралияга қарши ўтказиб, 2:1 ҳисобида зафар қучишди.

Ўйиндан олдинги фикрлар

Го Оива (Япония U-23 бош мураббийи): - Биз мусобақага яхши ҳозирлик кўргандик, шу боис ҳам ҳозир ярим финалда ўйнаймиз. Гуруҳ босқичини ажойиб тарзда ўтказдик, буёғига ҳам бор куч билан ҳаракат қиламиз. Иорданияга қарши чорак финал учрашуви қийин кечди, рақиб жисмонан бақувват экан. Лекин барибир ўзимизни кўрсата олдик. Ярим финалда яна бир кучли жамоага қарши ўйнаймиз. Агар яхши ҳимоялансак, ҳужумда албатта омадимиз келади деб ўйлайман.

Ли Кюнг Су (Жанубий Корея U-23 ёрдамчи мураббийи): - Рақибни яхши ўргандик, уларнинг Иорданияга қарши ўйинини кузатиб чиқдик. Иордания бу баҳсда 10та голли вазият яратди, демак биз ҳам бунинг уддасидан чиқа оламиз. Япония ҳали мағлуб бўлгани йўқ, бу эса уларнинг кучидан дарак беради. Агар кўпроқ прессинг уюштириб, қарши ҳужумларда яхши ҳаракат қилсак ўз мақсадимизга эришамиз деб ўйлайман.

Қизиқарли маълумотлар

- Бу ҳар икки жамоа ўртасидаги U-23 Осиё чемпионатида ўзаро тўртинчи тўқнашув бўлади. Дастлабки икки баҳс Япония устунлигида кечган (2016 ва 2022 йилги чорак финаллар), Жанубий Корея эса фақат гуруҳ ўйинида ғалаба қозонган (2024).

- Жамоалар ўзаро ўйинида кўп гол киритилмаган, ҳар икки жамоа ўта эҳтиёткорлик билан ўйнаган. Лекин аввалги учта беллашувда Япония рақиб дарвозасига 17 та, Жанубий Корея эса 26 та зарба йўллаган.

- Япония U-23 футболчилари Шусуке Фуруйа ва Рйуносуке Сато ҳисобида ҳозирча 3 тадан гол бор.

- Энг кўп тўп узатиш бўйича кўрсаткич Жанубий Корея U-23 терма жамоасида бўлиб турибди: Шин Мин Ха 290, Ли Хюн Ёнг 289, Мин Ха 313 марта пас беришни амалга оширган.

20 январь. 20:30

ВЬЕТНАМ - ХИТОЙ

Жидда. Prince Abdullah Al Faisal Sports City Stadium

Чорак финалда Ўзбекистон ёшлар термасини мағлуб этган Хитой бугун ярим финалда Вьетнам билан баҳс олиб боради. Дарвоқе Хитой терма жамоаси ўз тарихида биринчи бор U-23 Осиё чемпионати ярим финалида ўйнайди.

Шу ўринда Вьетнам ёшлар терма жамоасига ҳам қойил қолса арзийди. Улар худди Япония каби барча ўйинларда ғалаба қозониб келмоқда. Гуруҳ учрашувларида Вьетнам Иорданияни 2:0, Қирғизистонни 2:1 ва Саудия Арабистонини 1:0 ҳисобида мағлуб этиб, чорак финалда БААни чиқариб юбрди. Бу ўйин 3:2 ҳисобида якун топди.

Хитой эса гуруҳда Ироқ билан 0:0 ўйнаб, Австралияни 1:0 ҳисобида мағлуб этди ва охирги турда Таиланд билан яна 0:0 ўйнади. Ундан кейин чорак финалда 120 дақиқа кечган беллашувда биз билан ҳам 0:0 ўйнади. Эътибор беряпсизми, Хитой мусобақа бошидан ҳали гол ўтказгани йўқ. Уларнинг дарвозабони ҳар ўйинда "Буффон режими"ни ёқиб келяпти.

Ўйиндан олдин фикрлар

Ким Санг Сик (Вьетнам U-23 бош мураббийи): - Биз ярим финалга чиққанимиздан ва Жанубий Корея, Япония, Хитой каби жамоалар қаторида турганимиздан хурсандмиз. Биринчи ўйиндан ҳозиргача тўртта учрашув ўтказган бўлсак, футболчилар анча қийинчиликка дуч келди. Лекин ҳар доим вазиятдан чиқиб кетяпмиз ва шунинг учун ярим финалдамиз. Бу Вьетнам футболи учун янги босқич. Хитойга қарши баҳс осон кечмайди. Уларнинг дарвозабони Ли Хао жуда чиройли ўйин намойиш этяпти. Биз ҳам яхши тайёргарликка эгамиз деб ўйлайман.

Антонио Пуче (Хитой U-23 бош мураббийи): - Ўтган босқичда 2018 йилги мусобақа чемпионлари билан ўйнадик. Энди эса ярим финалда яна бир кучли жамоага қарши майдонга тушамиз. Бу турнир мен учун ҳам, жамоамиз учун ҳам ажойиб тажриба бўляпти. Биз ўйиндан ўйинга мақсад қўйиб бормоқдамиз. Ярим финалга қадар етиб келиш катта иш деб ўйлайман. Вьетнамни яхши биламиз, улар билан 2-3 марта ўйнаганмиз. Қийин баҳс кутмоқда, лекин биз жангга тайёрмиз.

Қизиқарли маълумотлар

- Бу U-23 Осиё чемпионати тарихида Вьетнам ва Хитой терма жамоаларининг илк тўқнашуви бўлади.

- Хитой U-23 ушбу мусобақада 3 та учрашувда гол ўтказмади. 

- Вьетнам U-23 учта ўйиннинг асосий вақтида дуранг қайд этди. Чорак финалдаги ғалаба эса экстра таймда қўлга киритилди.

- Хитой U-23 дарвозабони Ли Хао ҳозирча тўртта учрашувда 24 та сейв амалга оширди. Бу эса дарвозабонлар орасида энг яхши кўрсаткич бўлиб турибди. 

Хайрулла Холиқов