Биз бу борада сайтимиз журналисти Абдулазиз Искандаров Тожикистон футбол федерацияси матбуот котиби Фаридун Салиевнинг мулоҳазаларини тингладик.
"2026 йилги жаҳон чемпионатида мен икки жамоага — ўз биродарларимиз бўлмиш Ўзбекистон ва Эрон терма жамоаларига мухлислик қилдим. Ўзбекистон ўзининг дебют жаҳон чемпионатида очко жамғара олмагани, албатта, афсусланарли. Бироқ, жамоанинг ўз тарихида илк бор мундиал йўлланмасини қўлга киритганининг ўзи — ўзбек футболи солномасида абадий қоладиган улкан ютуқдир. Ишончим комилки, ушбу тажриба терма жамоанинг келгуси ривожи ва келажакдаги янги зафарлари учун мустаҳкам пойдевор бўлиб хизмат қилади.
Ўзбекистон терма жамоасининг ўйинлари ҳақида гапирадиган бўлсам, барибир рақибларнинг даражаси (класси) ўз сўзини айтганини таъкидлаш жоиз. Ўзбекистон терма жамоасининг Колумбияга қарши дебют учрашувини Тожикистон футбол федерациясидаги ҳамкасбларим билан биргаликда Ўзбекистоннинг Тожикистондаги элчихонасида томоша қилдик. Қўшниларимизга чин дилдан мухлислик қилиб, майдондаги ҳар бир вазиятда ҳаяжон билан қайғурдик. Якуний натижага қарамай, жамоа ирода кўрсатди, муносиб ўйин намойиш этишга ҳаракат қилди ва жаҳон футболининг энг юқори чўққисида бебаҳо тажриба тўплади.
Жамоанинг 2026 йилги жаҳон чемпионатидаги иштироки якунланганидан сўнг, кимдир терма жамоани танқид қиляпти, кимдир эса аксинча, мақтамоқда. Бу — футболнинг ажралмас қисми. Аммо, менинг фикримча, миллий терма жамоани ҳар қандай вазиятда — ғалабада ҳам, мағлубиятда ҳам қўллаб-қувватлаш керак. Айнан мана шундай мухлислик далдаси жамоани олдинга ҳаракат қилишга, муваффақиятсизликлардан тўғри хулоса чиқаришга ва янада кучлироқ бўлишга ёрдам беради",- дейди Фаридун Салиев.
