Таҳлил. Қосимовнинг "Пахтакор"га қарши ўзига ҳос бўлмаган қуроли иш берди

Кайфиятсиз "шерлар" 

"Пахтакор" бу учрашувга оғир руҳий кайфиятда етиб келди, хусусан Элит ОЧЛ жавоб учрашувида Ар-Риёдда меҳмон бўлган жамоа ортга 0:4 ҳисобидаги мағлубият билан қайтди. "Ал Ҳилол" Тошкентдаги ўйиндан фарқли равишда юз уйда ўзини сувдаги акула сингари тутди ва рақибига ҳеч қандай имконият қолдиргани йўқ. Биринчи учрашувдаги 1:0 ғалабаси 0:4 фонида заррача фойда келтирмади. "Пахтакор" "Ал Ҳилол" билан 12 март куни ўйнади, ОКМКга қарши учрашув 16 март кунига қўйилганди. Кўриниб турдики футболчилар ҳали ўша мағлубият тафтини унутишмаган, жисмоний томондан тикланиб улгуришмаганди. "Кончилар" 7 март куни "Бухоро"га қарши ўйиндан сўнг бу баҳсга етарлича ҳозирлик кўра олишди. Бундай шароитда ротациялар ёрдамга келади, Моррейра шу куни Риаскосни иккинчи бўлимга олиб қўйди ва Сергеевни асосий таркибда туширди. Лекин олмалиқлик ҳимоячилар рақибнинг индивидуал сифатли ижрочиларини майдонда эрта қарши олишлари, уларга марказдаёқ қаршилик бошлаши натижасида тўп Сергеевгача етиб келмади. "Пахтакор" биринчи бўлимда мезбонлар дарвозаси олдида кескинлик ярата олмади. Иккинчи бўлимда ҳам ОКМК мудофаа чизиғи вакиллари ажойиб ўйин кўрсатди. Танаффусдан фойдаланиб жамоа тикланиб олиши керак бўлади. 

Тактик ўйин ёхуд Қосимовга беш баҳо

Миржалол Қосимов "Бухоро" билан ўйиндан фарқли тактика ва таркибда ўзгаришларга қўл урди. Мураббий "Пахтакор"га қарши 3 марказий ҳимоячи тактикасидан фойдаланди. Марказий ҳимояда Раҳмонов, Тўхтахўжаев жуфтлиги Ўлмасалиев билан триога айланди, нисбатан ҳимояга ихтисослашган ва қора ишни бажарадиган Папава таянч ярим ҳимояда Рустамов билан жой олди. Орқа мустаҳкамланди. Буни рақибдан келиб чиқиб танланган тактика дейиш мутлақо тўғри бўлади. Бу билан "Пахтакор"нинг индивидуал кучли ижрочилари Фламарион, Алижонов, Адҳамзода тўлиқ зарарсизлантирилди. Яъни ОКМК бутун 90 дақиқа ҳимояланмади, балки зичроқ ҳаракат қилди. Бу Миржалол Қосимов жамоасига хос бўлмаган услуб ва тактика, лекин рақибнинг кучли жиҳатларини ёпишга қаратилган қуролдир. Яъни мутахассис жамоасида ҳар доим бу услубдан фойдаланмайди, фақат пайти келганида ўзгартиради. 

"Баҳсни уч нафар марказий ҳимоячи билан бошлашимизни рақиб кутмаган эди, назаримда",- дейди Миржалол Қосимов

Сеҳрли таёқча

Футболда 1:0 ҳисобини тўлиқ ғалаба деб бўлмайди. Исталган айниқса охирги дақиқаларда кичик эътиборсизлик ҳам ҳисобни тенглашишига олиб келади. Қосимов эса 83-дақиқада Ажак Риак ўрнига Али Абдураҳмоновни туширди. У эса худди "Бухоро" билан ўйинда бўлгани каби сўнгги дақиқаларни гол билан безади. Бир пайтлар Миржалол Қосимов "Бунёдкор"ни бошқарган вақтида Алибобо Раҳматуллаевдан ўйиннинг якунида фойдаланарди. Али Абдураҳмонов ҳам борган сари шу вазифани бажарувчи ролига ўтса ажабланмайман. Ёшлардан Нодирбек Абдураззоқов ҳам ўзини кўрсатишни бошлаб юборди. 

Кейинги тур учрашувлари

ОКМК ФИФА кунларига юз фоизлик натижа билан йўл олди. Эндиликда жамоа 28 март куни сафарда "Қизилқум", кейин 5 апрель санасида Олмалиқда Вадим Абрамов бошчилигидаги "Динамо", 9 апрель Ўзбекистон кубогида яна "Пахтакор", 12 апрель куни катта иштиёқ билан Суперлигага қайтган "Хоразм" билан учрашувлар кутиб турибди. Ўта кучли ҳам, ўта кучсиз ҳам эмас.  "Пахтакор"нинг тақвими нисбатан зич. 29 март уйда "Динамо", 2 апрель уйда 1-тур қолдирилган ўйинида "Машъал", 6 апрель Жиззахда "Сўғдиёна", 9 апрель мамлакат кубогида ОКМК билан ўйинлари бор.