"Кайфият яхши. Терма жамоага йиғилганда эски дўстлар билан кўришамиз. Шу сабаб кайфият кўтарилади", - деди Рустам Ашурматов бугунги машғулотларда.
- Тринидад Тобаго, Габон ва Венесуэла каби терма жамоаларга қарши ўйнаймиз. Рақибларнинг номи сизларга бироз енгиллик бердими?
- Йўқ. Биз Жаҳон чемпионатига тайёргарлик кўряпмиз. Шу сабабли рақиб ким бўлишидан қатъи назар ўзимизнинг ўйинимизни яхшилашга ҳаракат қиламиз. Рақибдан кучлироқмиз ёки кучсизмиз демай, майдонга чиқиб ўз ўйинимизни кўрсатамиз.
- Эрон чемпионати тўхтаб қолган. Легионерлар бир томонлама шартномани бекор қилиш бўйича янгиликлар борми?
- Катта эҳтимол билан шартнома бир томонлама бекор қилинмайди. Яқин орада Эрон чемпионати давом этади, деган гап-сўзлар бор. Маҳаллий лига давом эттирилмайдиган ҳолатда ҳам ФИФАга хат жўнатиб бўлинган. Ҳозирги вақтда жавобни кутяпмиз. ФИФА рухсат берса, қайсидир жамоада ижарада ўйнашимиз мумкин.
- Деярли тўрт ҳафтадан буён футбол ўйнамадингиз. Эрон чемпионатининг тўхтатилгани спорт формангизга қанчалик таъсир ўтказди?
- Истаймизми йўқми барибир таъсир ўтказади. Футболчига ўнта машғулотдан кўра битта ўйинда иштирок этгани афзал. Биз профессионал сифатида максимал тарзда машғулотлар ва терма жамоа ўйинлари орқали спорт формамизни имкон қадар сақлаб туриши керак.
- Қайси рақибга қарши ўйин қийинроқ бўлишини кутяпсиз?
- Бу жамоалар билан ўйнаб кўрмаганмиз. Шу сабабли бир хил тайёргарлик кўрамиз. Қолганини эса вақт кўрсатади.
- Ҳусниддин Алиқулов оғир жароҳат олди. Афсуски, у мундиални ўтказиб юборади. Алиқуловнинг йўқлиги қанчалик жиддий йўқотиш?
- Жуда катта йўқотиш. Алиқулов ҳимоямизнинг етакчиси эди. Унга соғлиқ тилаб, имкон қадар тезроқ сафга қайтишига тилакдошман.
