Ла Лига мадридликларнинг "Валенсия"га қарши учрашувини 7 ноябрь, шанба кунига белгилади. Ҳолбуки, 4 ноябрь, чоршанба куни жамоа Афинада АЭКга қарши Чемпионлар лигаси ўйинини ўтказади.
Шу тариқа, "Реал"да "Валенсия" билан ўйинга тайёргарлик кўриш учун фақат пайшанбанинг иккинчи ярми ва жума куни қолади. Клубдаги манбаларнинг маълум қилишича, ушбу қарор футболчиларда ҳам, мураббийлар штаби ходимларида ҳам "жиддий норозилик ва ҳайрат" уйғотган. Клубдагилар учрашувни якшанба куни ўтказишда ҳеч қандай муаммо йўқ деб ҳисоблайди: ундан кейинги ҳафта на еврокубоклар, на Кубок баҳслари бўлади.
Чемпионлар лигасида иштирок этаётган Испаниянинг қолган тўрт клуби эса ўз учрашувларини 8 ноябрь, якшанба куни ўтказади. "Бетис" "Элче" меҳмони бўлади, "Вилярреал" "Хетафе"ни қабул қилади, "Атлетико" эса ўз майдонида "Барселона" билан тўқнаш келади.
Шу билан бирга, "Барселона", "Атлетико" ва "Вилярреал" еврокубок баҳсларини бир кун олдин — 3 ноябрь, сешанба куни ўтказади. Ҳар учала жамоа ҳам ўз уйида ўйнайди: "Барселона" "Астон Вилла"ни, "Атлетико" "Бавария"ни, "Вилярреал" эса "ПСЖ"ни қабул қилади. "Бетис" эса чоршанба куни Германияда Дортмунднинг "Боруссия" клубига қарши майдонга тушади.
Бундан ташқари, мазкур турдан сўнг дарҳол терма жамоалар ўйинлари сабабли навбатдаги танаффус бошланади. Шу боис "Реал"дагилар нима сабабдан футболчиларга қўшимча бир кунлик дам бериб, учрашувни якшанба куни ўтказиш мумкин эмаслигини тушуна олмаяпти.
