Расмий хабар: Жанубий Кореянинг янги бош мураббийи маълум қилинди
04 июл 2017 11:24
Янгиликлар

Расмий хабар: Жанубий Кореянинг янги бош мураббийи маълум қилинди

ЖЧ-2018 саралашидаги Ўзбекистон терма жамоасининг рақиби Жанубий Корея янги бош мураббийга эга бўлди.

Жанубий Корея терма жамоаси собиқ футболчиси Шин Тае Йонг эндиликда бош мураббий лавозимида ишлайди. Бу ҳақда championat.asia ОФК расмий сайтига таяниб хабар берди.

Мураббий бунга қадар Жанубий Корея U-20 терма жамоасини бошқариб келаётган эди. Ули Штилике келгунига қадар 2014 йил сентябрь ойида айнан Шин Тае Йонг бош мураббий лавозимини бажарувчи бўлиб ишлаган эди.

31 август куни Шин Тае Йонг бошчилигидаги корейслар ўз майдонида Эронни қабул қилишади. 5 сентябрь куни Жанубий Корея Тошкентда Ўзбекистон билан ўйнайди.

46 ёшли Шин Тае Йонг 2005 йилдан мураббийлик фаолиятини бошлаган. Дастлаб уч йил давомида "Брисбен Роар" клубида ёрдамчи бўлиб ишлади. 2009 йил "Сеонгнам Илва Чунма"га келди ва 2010-2012 йилларда бош мураббий бўлиб ишлади.

2014-2016 йилларда Жанубий Корея терма жамоаси мураббийлар штабида фаолият олиб борди. Охирги икки йилда Жанубий Корея U-23 ва U-20 терма жамоаларини бошқарди.