"Ҳа, ўша вазият эсимда. Мен Ашхободдан Ростов-Донга, СКА жамоасига жўнаб кетаётгандим. Аэропортга таксида кетаётгандим ва машина светофорда тўхтади. Ашхободнинг "Колхозчи" жамоасидаги дарвозабонимиз Сергей Покатиловни кўриб қолдим, у ўша пайтда анчадан бери "Пахтакор" дарвозасини қўриқлаб келаётган эди. Машинадан тушиб, у билан сўрашмоқчи бўлдим; биз анчадан бери кўришмаган эдик, лекин чироқ яшил ёнди ва такси юриб кетди. Ростов-Донга етиб боргач, жамоага қўшилиш учун ариза ёздим. Кейин хотинимга қўнғироқ қилиш учун почтага бордим. Ҳозирги кунда тушунтириш керакки, ўша пайтларда шаҳарлараро қўнғироқлар учун марказий почтага бориларди. Қўнғироқ қилсам, хотиним шундай дейди: "Покатилов келувди, сени "Пахтакор"га таклиф қиляпти". Жуда хафа бўлиб кетдим, чунки у ерда Михаил Ан билан бирга ўйнашни хоҳлардим. Кўринишидан, Яратганнинг ўзи мени Тошкентга бориб қолишдан асраган экан.
Миша билан эса ёшлар ўртасидаги турнирлардан бирида – Навоийдаги "Умид кубоги"да юзма-юз келганман. Ўшанда Ўзбекистон ССР терма жамоаси сафида ўйнаган Ан деярли ёлғиз ўзи бизнинг Туркманистон ССР жамоамизни "айлантириб ташлаган" эди. Улар бизни 4:0 ҳисобида мағлуб этишди ва барча голлар бир хил сценарий бўйича урилди: Миша тўпни оларди, ҳаммани алдаб ўтиб, гол урарди. Мен шунчалик ҳайратда қолгандимки, ҳатто бироз вақтга футболни ҳам ташлаб юбордим. Тенгқуримнинг шундай қойилмақом даражадаги ўйинини кўрганимдан кейин ярим йил давомида футбол ўйнамадим.
Улар ҳалокатга учраганида эса, мен янги таркиб йиғиши керак бўлган янгиланган "Пахтакор"га ўтиш учун ариза ёздим, бироқ армия қоидалари осонгина кетишимга йўл қўймасди, сабаби мен катта лейтенант эдим. Жуда ҳам боргим келганди; мураббийимиз Николай Александрович Самариннинг олдига ҳам бордим, лекин...
Ўша СКАнинг ўзида биз билан Юрий Чуркин ўйнарди, унинг акаси Виктор "Пахтакор" ҳалокатида вафот этганди. Мен у билан меҳмонхонада бир хонада турардим. Самарин мендан бу мудҳиш хабарни унга етказишимни сўради, лекин хонага кирганимда Юранинг: "Нима бўлди?" деган саволларига ҳеч нарса деб жавоб бера олмадим. Натижада, ҳаммасини мураббийлар айтишига тўғри келди", деди Бердиев.
