"Полиция жамоаси"га қарши баҳс: "Насаф"ни қандай рақиб кутиб турибди?

Келинг, ушбу жамоа ҳақида бироз тўхталамиз.

"Ал Шорта" жамоаси 94 йиллик тарихга эга. Клуб 1932 йили Бағдод шаҳридаги полиция мактаби директори Мудҳафар Аҳмад томонидан ташкил этилган. 

Жамоага мухлислар томонидан "Police team" (полиция жамоаси) деган ном берилган.

"Ал Шорта" ўз уй учрашувларини Бағдод шаҳридаги "Ал Шорта" стадионида ўтказади. Ушбу майдон ўз бағрига 10 мингдан зиёд мухлисни сиғдира олади.

Жамоа Ироқ чемпионатининг 8 карра ғолиби, Ироқ Суперкубогининг 2 карра соҳиби ва 1 карра федерация кубоги эгаси ҳисобланади.

"Ал Шорта" шу вақтга қадар Элит Чемпионлар Лигаси (собиқ Осиё чемпионлар лигаси) мусобақасида жами 34 та ўйин ўтказган. 3 та ўйинда ғалаба қозонган, 23 та ўйин бағдодликларнинг мағлубияти билан якунланган. 8 та баҳсда эса дуранг натижа қайд этилган.

Жамоани айни пайтда 52 ёшли мисрлик мутахассис Моамен Солиман бошқармоқда. Бу мутахассис ўз вақтида "Замалак", "Ал Қува Ал Жовия", "Ал Иттиҳод" Триполи каби клубларида фаолият олиб борган. Шуниндек, қисқа вақт Мисрнинг 17 ёшгача бўлган терма жамоасида ишлади.

Унинг бошқарувида "Замалак" клуби 2016 йил Миср кубогини қўлга киритди. "Ал Шорта" жамоаси эса 3 карра Ироқ Юлдузлар лигасида тенгсиз бўлди. Шунингдек, жамоа 1 мартадан Ироқ Суперкубоги ва Федерация кубогида зафар қучди.

Жамоа таркибида айни вақт Ҳусайн Али, Манаф Юсуф, Аҳмад Яҳё, Мустафо Садун, Аҳмад Басил каби Ироқ миллий терма жамоаси футболчилар тўп тепмоқда. Шунингдек, Мутез Заддем, Маҳмуд Ал Мавас, Були Самбу, Леонел Атеба, Абдул Мажид Мумуни, Доминик Менди каби маҳоратли легионер футболчилар ҳам айни вақтда ушбу жамоада фаолият олиб бормоқдалар.

Эслатиб ўтамиз, "Насаф" – "Ал Шорта" ўйини Фарғона шаҳрида жойлашган "Истиқлол" стадионида соат 18:45 да старт олади.