Нукус шаҳридаги "Турон" стадиони 2026 йилги мавсумга тайёр бўлади

Шунингдек, ПФЛ раҳбари Қорақалпоғистон Жўқорғи Кенгеси раиси Аманбай Оринбаев билан ҳам учрашган. Championat.asia сайтига маълум бўлишича, "Турон" стадиони 2026 йилги мавсумнинг иккинчи ярмига тайёр бўлиши кўзда тутилган. Бироқ айни вақтда стадионни келаси йилнинг март ойига сўнгига қадар фойдаланишга топшириш учун ҳаракат бошланган. Мазкур масала "Арал" клубининг Суперлига йўлланмасига эга чиқиши масаласи билан бевосита боғлиқ бўлиши мумкин. 14 декабрь куни "Арал" ўтиш ўйинида Суперлига клубига қарши кураш олиб боради. 

Айни вақтда "Арал" билан боғлиқ икки ҳолат учун режалар ишлаб чиқилади. Клуб Суперлигада иштирок этса, очилиш ўйини янги стадионда ўтиши учун барча воситалар ишга солинади. Йўлланма қўлга киритилмаган тақдирда ҳам "Арал" 2026 йил барибир "Турон" стадионига қайтади ва катта эҳтимол билан клуб сметасида сезиларли ўзгариш юз беради ва барча куч ҳамда имкониятлар "Арал"ни Суперлигага олиб чиқиш учун йўналтирилади. 

Қайд этиш керак, ПФЛ Суперлига географиясини кенгайтириш устида ишламоқда. Ўтган мавсум қатор қаршиликларга қарамай, ПФЛ "Хоразм" клубининг Суперлигада иштирок этиши учун охирги сонияларга қадар регламент бандларини ҳимоя қилганди. Айни вақтда "Турон" стадионини катта футболга тайёрлаш ишлари ҳам шу йўсинда олиб борилмоқда. Нукусдаги стадионга ФИФА сифат даражасига жавоб берадиган энг сўнгги турдаги сунъий майдон ётқизилади. "Хоразм"даги қоплама сифати ҳам худди шу каби барча талабларга жавоб беради ва айни вақтда Урганчдаги стадионга аллақачон катта футбол қайтиб улгурган.