Нодирбек Абдураззоқов: "Ҳамма ўз хатосини билади"

Олмалиқликлар мавсумни яхши бошлаганига қарамай кейинчалик барқарорлик етишмаслигидан азият чека бошлади, натижалар турлича кўриниш олди. Ўтган турда Жиззахда "Сўғдиёна"га йирик ҳисоба енгилган ОКМК жамоасини олдинда яна бир жиддий синов "Бунёдкор" кутмоқда. Бу учрашув олдидан жамоа ярим ҳимоячиси Нодирбек Абдураззоқов фикрларини билдирди. 

- "Сўғдиёна" билан ўйиндан қандай хулосалар чиқарилди?

- Бу учрашувни ҳамма таҳлил қилди деб ўйлайман. Барча ўз хатосини билади. Олдиндаги учрашувларда ўзимизни кўрсатишга ҳаракат қиламиз. 

- Бўлажак муҳим беллашувга ҳозирлик қандай кетяпти?

- ОКМК рақиб танламайди. Ҳар бир жамоага жиддий ёндошамиз. Фақат ғалаба учун майдонга чиқамиз. 

- Бу йил жамоа Олмалиқда бир маротаба мағлубиятга учради. "Бунёдкор" билан ўйинда бу устунлик берадими?

- Ўз мухлисларимиз олдида тўп тепиш ёқимли. Шундай экан уларни хурсанд қилишимиз керак бўлади. 

- Турнир жадвалидаги рақобат ва йўқотилаётган очколар фонида ОКМКнинг имкониятлари пасайиб кетмаяптими?

- Энди қолган учрашувларда максимал очко жамғаришга эътибор қаратамиз. 

- Бишкекда ўтган U-23 Осиё Кубогига саралаш учрашувларида нима учун терма жамоамиз кутилган ўйинни кўрсата олмади?

- Ўйинимизни тўлиқ кузатганлар бундай демайди. Биз ҳар бир ўйинда устунлик қилдик. Фақат гол уришга қийналдик. Айрим вазиятларда омад етишмади. Муҳими вазифани бажардик.