Никола Лазаревич: "Жамоамизнинг ҳар бир вакилини "Навбаҳор" устидан қозонилган ғалаба билан муборакбод этаман"

- Ўйин ҳақида

- Биринчи навбатда, бу ғалабани Навоий халқига бағишлишимизни айтиб ўтмоқчиман. Мухлислар 2 йил кутишди ва ниҳоят, Навоийда тўп тепдик. Ўйлайманки, уларни хурсанд қила олдик. Бошқа томондан, раҳбарият ва мутасаддиларга миннатдорлик билдирмоқчиман. Жамоамизнинг ҳар бир вакилини ҳам ғалаба билан муборакбод этаман. "Насаф"дан қабул қилиб олинган йирик мағлубиятдан (0:4) кейин футболчилар билан гаплашиб олгандик ва навбатдаги баҳсга жиддий ҳозирлик кўргандик. Бугун ҳаммаси ўхшади. Энг муҳими, 3 очкога эга чиқиш эди. Жамоамиз бундан кейин ҳам фақат ижобий натижани кўзлаб майдонга тушади. Биз "Навбаҳор" кучли жамоа эканлигини билардик. Улар тўпни яхши назорат қилиши ва ҳужумни қандай тартибда бошлашидан хабардор эдик. Ўйин 50 га 50 бўлиб ўтди. Бизга омад кулиб боқди.

- Роман Папарига дастлабки 3 та ўйинда яхши ҳаракат қилаётганди, ҳозир эса унинг ҳолати яхши эмасдек туюлмоқда. Бугун аниқ зарба ҳам беролмади. Унга нима бўлди?

- Мавсум давомида шундай онлар бўладики, футболчи яхши бошлайди, аммо кейин формаси бироз тушади. Папарига яхши ҳолатда келганди. У "Нафтан" (Беларусь)да ёрқин ўйин кўрсатган ва қайсидир маънода ўзини ўзи бошқа жамоаларга тавсия қила олган. Эҳтимол, ҳозир унда бироз пасайиш кузатилаётгандир, лекин у машғулотларда тиним билмайди. 

- Шаҳзод Раҳматуллаев қайдномада ҳам йўқ эди. У қачон қайтади?

- У ўтган ўйинда жароҳат олди. Шифокорлар тавсиясига кўра унга дам берилди. Шундан сўнг секин-аста тикланиш машғулотларини олиб боради ва кейинги ўйинларга қайтади.