– Бугунги ўйин хусусида нималарни айта оласиз?
– Энг муҳими, уч очкога эга бўлдик. Осон ўйинларнинг ўзи йўқ. Қолаверса, "Қўқон-1912" жамоаси ҳам яхши шаклланган, уларнинг сафида ўзига яраша малакали футболчилар ҳаракат қилади. Яна бир жиҳати шуки, улар бугун жиддий қаршилик кўрсатишди, сабаби ушбу жамоага очколар сув ва ҳаводек зарур эди. Шунинг учун ҳам улар бор кучини кўрсатишди. Бироқ, шунга қарамай, биз энг керакли бўлган уч очкони қўлга киритдик. Учрашув яна драматик, яна асабий руҳда ўтди – гўёки ўша "валидол" ичиладиган ҳолатдек. Йигитлар ҳам борини бериб ҳаракат қилишди. Ҳисоб 1:0 бўлиб турган пайтда ҳам қулай вазиятлардан унумли фойдаланганимизда, натижа умуман бошқача бўлиши мумкин эди. Шунинг учун бу ўйин яна бир бор ўз ҳақиқатини тасдиқлади: футбол тўқсон дақиқа ўйналади. Сал эътиборсизлик қилганимизда, очко йўқотишимиз ҳам мумкин эди. Қўллаб-қувватлаганлари учун мухлисларимизга раҳмат айтаман.
– Ўйиннинг боришига эътибор қаратсак, бугун одатдагидек фаол ОКМКни кўрмадик. Бир қарашда, рақиб турнир жадвалида пастроқ ўриндаги жамоа эди ва биз сиздан – ўз уйингизда ўйнаётганингиз учун ҳам – устунлик кутган эдик. Лекин ўйин бошида ташаббус рақиб томонида бўлди. Улар бир неча хавфли вазиятларни юзага келтиришди. Бунга сабаб нима эди?
– Сабаби шундаки, биринчи навбатда, биз ўз ўйинимизни намойиш этишимиз керак эди. Иккинчидан, рақиб жамоа 4-4-2 схемасида ҳаракат қилиб, кўпроқ ҳужумга эътибор қаратди ва узун узатмалардан фойдаланди. Албатта, биз ўйин тизгинини ўз қўлимизга олиб, энг кучли томонимиз бўлган қисқа узатмалар ва комбинацион ўйин кўрсатишимиз лозим эди. Бироқ биз биринчи бўлимда кўпроқ "Қўқон-1912" жамоасининг услубига мослашиб, узун паслар билан ўйнаб қўйдик. Тўплар кераксиз жойларда йўқотилди ва шошқалоқликка йўл қўйилди. Узун узатмалардан кўп фойдаланган жамоанинг ҳужумчилари қайтган тўпларда ҳам устунликка эришди. Тўпга эгалик қилган жамоа эса гўёки ўйинни бошқараётгандек яққол кўриниб туради. Лекин биринчи бўлимнинг охирларида ўз дарвозамиз олдида жуда хавфли вазиятлар юзага келгани йўқ. Аслида, майдонда биз ўз шартимизни белгилашимиз керак эди, аммо бу ерда вазият тескарисига айланиб қолди.
– Ҳозирда ОКМК клуби Ўзбекистон Кубогининг ярим финалига чиққан ва ўз-ўзидан кубокни қўлга киритиш вазифаси қўйилгани аниқ. Иккита мусобақада иштирок этаётган жамоанинг Кубокдаги бу мақсади Суперлигадаги ўйинларига салбий таъсир кўрсатмайдими?
– Йўқ. Лекин мана шуниси ёмонки, баъзан "кучни сақлаймиз" деб майдонда кўп хатоларга йўл қўямиз. Бугун ҳам иккинчи бўлимда бу ҳолат яққол кўринди. Қулай вазиятларда тезроқ югуриб, тўпни тезроқ узатиб ва учинчи зонада бир-биримизга ёрдамлашиб ҳаракат қилишимиз керак эди. Кимдир ўзига озгина енгиллик берди ва оқибатда мана шундай 1:1 ҳисоби юзага келди. Ҳисоб шу кўринишда қолиб кетиши ҳам мумкин эди. Яратилган вазиятларни голга айлантириш ва тезроқ ўйнаш лозим эди. Керакли вазиятда прессинг уюштиришимиз шарт эди, лекин биз прессинг ўтказмадик. Натижада улар бемалол бизнинг зонамизга кириб келишни бошлашди. Бу ўзимизнинг айбимиз, чунки югурмасдан туриб қандайдир натижага эришмоқчи эдик. Ваҳоланки, футбол – бу динамика, югуриш ва тинимсиз ҳаракатдир. Фақат шундагина мақсадга эришиш мумкин. Шу сабабли ҳам, рақибнинг бир ўйинчиси майдондан четлатилди дегани – бу ўйинни ташлаб юбориб, бемалол кутиб ўтирамиз дегани эмас. "Қўқон-1912" сафида ўзига яраша малакали футболчилар бор эди ва улар бизнинг сусткашлигимиздан фойдаланиб, етарлича муаммо яратиб беришди. Бизда ротация бор ва ушбу чемпионатда ҳам ротация амалга оширилади. Лекин ҳар бир ўйинга чиққандан сўнг мухлислар учун ўйнаш керак. Мен ҳар доим айтганман: стадионга бир нафар мухлис келса ҳам, биз ўша инсон учун ўйнашимиз шарт.
– Бронза медалларини қўлга киритиш имкониятига қандай қарайсиз? Учинчи ўринни ушлаб қолишга кучингиз етадими? Чемпионат тугашига ҳам оз вақт қолди.
– Бу ҳақда чемпионат якунига етганидан кейин гапираман. Қоғозда ҳам, амалда ҳам имкониятларимиз бор. Ҳар бир ўйинда ғалаба учун ҳаракат қиламиз. Навбатдаги ўйинда бизни "Локомотив" кутиб турибди. Бугунги учрашув эса аллақачон тарихга айланди. "Локомотив"га қарши баҳсда қандай натижа қайд этилишини вақт кўрсатади, ҳозирдан бир нима дейиш қийин.
