– Ғалаба билан табриклаймиз! Бу ютуқ Конго халқи учун нимани англатишини тушунтириб бера оласизми? Жаҳон чемпионатидаги аввалги хотираларда фақат 3 та мағлубият ва 0:9 ҳисобидаги мағлубият бор эди. Бунинг Конго халқи учун аҳамияти қандай?
– Бу уларнинг ўз жамоаси билан фахрланишини англатади. Ўйлайманки, бугун одатимизга кўра, нима қилишимиз кераклигини аниқ билардик. Ўйиннинг бошидаёқ гол ўтказиб юбордик, аммо сўнгги пайтларда Португалия ёки Нигерияга қарши саралаш ўйинларида бўлгани каби, биз вазиятни ўнглай олдик ҳамда катта фидокорлик ва мотивацияни намойиш этдик. Ўйиннинг умумий манзарасига қарайдиган бўлсак, ғалаба мантиқий бўлди. Шунинг учун буни ўзига хос қаҳрамонлик деб биламан. Биз учун энг муҳими – Конгонинг гўзал қиёфасини яна бир бор кўрсата олганимиздир.
– Кеча сиз Африка жамоалари ҳақида гапирган эдингиз. Мазкур мусобақада сизнинг ва бошқа бир қатор Африка термаларининг муваффақиятли юриши сизни ҳайрон қолдиряптими? Бунга муносабатингиз қандай?
– Аввало, саволингизга жавоб беришдан олдин, ўз футболчиларимни табрикламоқчиман, чунки улар жуда яхши ўйин ўтказишди. Бу – бир жамоа бўлиб 4 йил давомида қилинган меҳнатнинг узвий давоми. Биз биргаликда ишонишда ва олдинга интилишда давом этдик. Шунинг учун биринчи навбатда футболчиларимга ва ҳар куни ёнимда ишлайдиган барча мураббийлар штабига миннатдорчилик билдирмоқчиман.
Саволингизга келсак, буни кеча ҳам таъкидлаган эдим: Африка қитъасидан 1/8 финалга чиққан жамоаларнинг кўплиги қандайдир маънода фахрланарли ҳолат. Бу меҳнат ва ривожланиш натижасидир. Олдинга силжиш учун ҳали ҳам катта имкониятлар мавжуд ва биз бутун камтарлигимиз билан Африка футболи ривожига ўз ҳиссамизни қўшишга ҳаракат қиляпмиз.
– Ўзбекистон томонидан эрта урилган гол, сўнгра офсайд сабабли бекор қилинган яна бир гол бўлди. Дастлабки голдан кейин жамоада асабийлик кузатилдими ёки барибир ўйинни ютиб кета оламиз, деган ишонч бормиди?
– Ўйинда ғалаба қозонишга ҳеч қачон юз фоиз кафолат бўлмайди. Аниғи шуки, биз тактик хатога йўл қўйдик, ичкарини бироз эрта очиб юбордик ва уларнинг ҳужумчиси жуда чиройли зарба билан гол урди – тан олиш керак, у жуда яхши футболчи. Аммо мусобақа бошиданоқ бизга нисбатан қулайроқ туюлган учинчи ўйин учун баъзи футболчиларга дам беришни режалаштирган эдик. Шундай ҳам бўлди, дастлабки икки ўйинда қатнашмаган футболчилар жамоага янги куч бағишлади. Айтиб ўтганимдек, тўп назорати ва кўрсатган ўйинимизга кўра ғалаба қозонганимиз мантиқан тўғри бўлди.
– Сиз бу жамоани 2022 йилда қабул қилиб олганингизда, жамоа Жаҳон чемпионати саралашида Марокашдан йирик ҳисобда енгилган, сўнгра Африка Миллатлари Кубоги саралашида Судан ва Габонга мағлуб бўлганди. Ўшанда дастлабки мағлубиятларга қарамай, асосий мақсадингиз Африка Миллатлари Кубогига йўлланма олиш ва мана шу Жаҳон чемпионатига чиқиш эканини айтгандингиз. Бугунги ютуқларингиз, жамоада яратилган тизим ва Киншасага, умуман Конго футболига киритган меҳнатингиз ҳақида ўйлаб кўришга вақтингиз бўлдими? Бу жамоа билан қанчалик узоққа борганингизни сарҳисоб қилдингизми?
– Ҳа, олдимизга мақсадлар қўйганимизда, бу лойиҳага бутун борлиғимиз билан киришгандик. Лойиҳамизни тушунтириш учун кўп саёҳат қилдик. Бироқ бундай ишни ёлғиз ўзим эплай олмасдим. Менда ажойиб инсонлардан ташкил топган асосий ўзак бор. Мураббий учун шундай яхши инсонлар билан ишлаш – ҳақиқий омад. Улар нафақат яхши футболчилар, балки Конго терма жамоаси либоси учун борини беришга тайёр бўлган ажойиб шахслардир. Энг муҳими ҳам шу. Вақти келганда натижаларни сарҳисоб қиламиз, лекин ҳозирча талаб қилинган ва эришилган мақсадлар бўйича биз ўз ўрнимиздамиз. Бу катта меҳнат талаб қилгани учун фахрланиш ҳисси бор, албатта, лекин шуни унутмаслик керакки, муваффақият – бутун бошли механизмнинг натижасидир. Бугунги кунда футболчиларим билан жуда фахрланаман, чунки биз шу лойиҳани охирига етказиш учун бир жамоа бўлиб қолдик, бу йигитларга ишондик ва бугунги оқшом меҳнатимиз ўз мевасини берганини исботлади.
– Бугунги оқшом қаҳрамони бўлган Йоан Виссанинг ўйини ҳақида нима дея оласиз?
– Мен одатда фақат бир футболчи ҳақида кўп гапирмайман, лекин ҳақиқатан ҳам у бугун ҳал қилувчи ролни ўйнади. Бошқалар қатори у ҳам мавсумни жуда қийин бошлаган эди. Ўтган йили сентябрь ойида Сенегалга қарши ўйинда жароҳат олган ва бу унга руҳий томондан қаттиқ таъсир қилганди. Чунки трансферлардан сўнг у 100 фоиз тайёр эмаслигидан ва "Ньюкасл" мухлисларига ўзининг нималарга қодирлигини кўрсата олмаётганидан қийналди. Аммо у секин-аста ўз формасига қайтди ва биз унга ишонч билдирдик. Унинг клубида ҳам баъзи қийинчиликлари бўлди, лекин биз бирдаммиз ва бу синовлардан биргаликда ўтдик. Унинг бугунги кунда голлар ураётганидан жуда хурсандман, чунки у ҳозир ҳақиқатан ҳам ўзининг энг яхши спорт формасида.
– Ушбу тарихий ғалаба билан табриклаймиз. Айни пайтда Конго энг яхши учинчи ўринни эгаллаган жамоа бўлиб турибди. Бу тарихий натижадан қанчалик фахрланасиз?
– Ҳа, биз кейинги босқичга чиққанимиздан фахрланамиз. Қуръа ташлангандаёқ, агар учинчи ўринни эгалласак, Англия гуруҳидан чиққан жамоа билан ўйнашимизни билардик. Учинчи ўринни эгаллашнинг ўзи унчалик катта аҳамиятга эга эмас, лекин рамзий маънода бу муҳим, чунки учта ўйин якунига кўра биз 4 та гол урдик. Бу кўрсаткич бизда гол уриш қобилияти борлигини кўрсатади ва бу жуда яхши.
– Бир неча кундан кейин яна шу ерда ўйнайсиз. Англияга қарши ўйинга жамоани тайёрлашда қандай фалсафага таянасиз ва сизни яна бир ажойиб ўйин кўрсатишга нима ундайди?
– Биз вазиятга мослашамиз. Қуръа натижасига кўра яна шу ерда ўйнашимизга тўғри келяпти. Эртага йўлга чиқиб, кейин яна қайтиб келамиз деб ўйлайман. Биз мослашамиз, бу унчалик катта муаммо эмас. Одатдагидек, имкон қадар профессионал тарзда тайёргарлик кўрамиз. Эртадан бошлаб бор эътиборимизни 1/8 финалдаги ўйинга қаратамиз. Бу – мутлақо бошқа мусобақа, плей-офф ўйинлари. Бундай ўйинларда фаворитлар учун ғалаба қозониш доим қийин кечади. Биз эса Англияга қарши ўйинда аутсайдер сифатида майдонга тушамиз. Уларда Англия чемпионатида ўйнайдиган футболчилар бор. Бу барча учун яна бир катта ўйин бўлади ва биз ғалаба қозониш учун бор кучимиз билан тайёргарлик кўрамиз.
