Меҳр ахборот агентлигининг “Трактор” клуби матбуот хизматига таяниб хабар беришича, мутахассис шогирдларининг ўйини ва камчиликда қолганига қарамай, курашни давом эттирганидан мамнун эканини таъкидлаган.
“Футболчиларимга миннатдорлик билдираман. Улар жуда яхши ўйнашди. Учрашувни яхши бошлай олмадик, бироқ тез орада тактик схемамизни ўзгартириб, ўйин назоратини қўлга олдик. Биринчи бўлим биз учун яхши якунланди.
Иккинчи бўлимда янада яхшироқ ўйнашимизни билардик ва шундай бўлди ҳам. Жамоамиз яхши ҳаракат қилаётган бир пайтда ғалати гол ўтказиб юбордик. Бу бизга қийинчилик туғдирди. Кейин эса футболчиларимиздан бири майдондан четлатилди ва ўйинни 10 киши бўлиб давом эттиришга мажбур бўлдик.
Мен ҳам, футболчиларим ҳам бугун муваффақиятга эришишимизга ишонардик. Қийин вазиятда, бир киши кам бўлиб ўйнаганимизга қарамай, икки марта ҳисобни тенглаштирдик. Футболчиларим яхши ҳаракат қилишди. Жароҳат олган икки футболчимиз ҳам ушбу ўйингача сафга қайтди ва уларнинг иштироки жамоамизнинг ҳолатини сезиларли даражада яхшилади”, – деди Некунам.
“Трактор” устози захирадан майдонга тушган икки футболчининг гол ургани ва Шаҳриёр Муғанлунинг алмаштирилиши тактик қарор бўлгани ҳақидаги саволга ҳам жавоб берди.
“Ҳа, бу тўлиқ тактик қарор эди. Ҳар бир футболчининг яхши ва ёмон кунлари бўлади. Шаҳриёр Муғанлу жамоамиз учун кўп меҳнат қилган ва доим бор кучини сарфлайди. Бироқ бизга тактик ўзгариш керак эди. Шу сабабли уни эртароқ алмаштиришга қарор қилдим ва уч ҳимоячили схемадан тўрт ҳимоячили тизимга ўтдик. Шундан кейин ўйин назоратини қўлга олдик”, – деди мутахассис.
Некунам футболчиларининг иродасини алоҳида эътироф этиб, жамоаси учинчи голни ҳам киритиши мумкин бўлганини таъкидлади.
“Бу жасорат учун футболчиларимдан миннатдорман. Улар бор кучларини бериб ўйнашди. Ҳатто учинчи голни ҳам уришимиз мумкин эди, аммо омадимиз келмади.
Рақибнинг иккинчи голидан олдин бизда гол уриш имконияти бор эди, бироқ ундан фойдалана олмадик. Кейин эса рақиб гол урди. Албатта, ўша зарба фавқулодда даражада яхши ижро этилганди.
10 киши бўлиб икки марта ҳисобни тенглаштирганимиз жамоамиз курашишни билишини кўрсатади. Энг муҳими, шу руҳни сақлаб қолишимиз керак. Бугун футболчиларимиз жасорат кўрсатди. Айниқса, иккинчи бўлимда асосий футболчиларимиз сафда бўлса, ҳар қандай жамоага жиддий рақобат кўрсата олишимизни исботладик”, – деди мураббий.
Шунингдек, Некунам “Нефтчи” бош мураббийининг “Трактор” жароҳатланган футболчи майдонда ётган пайтда гол ургани ҳақидаги эътирозига муносабат билдирди.
“Биз қўшиб берилган дақиқаларда гол урдик. Агар рақиб футболчиси жиддий жароҳат олганида, уларнинг эътирози ўринли бўларди. Аммо футболда мушак тортишиши ёки оёқда оғриқ пайдо бўлиши табиий ҳолат.
Биринчи бўлимда ҳам футболчимиз майдонда ётган пайтда рақиб тўпни майдон ташқарисига чиқармади. Бундай вазиятлар футболда учраб туради. Ҳеч қандай ғайриоддий ҳолат юз бергани йўқ”, – деди Некунам.
