Жамшид Саидов: "Хомяков билан узоқ вақт давомида бирга ишлаганман. Бугун бир очкони қўлга киритдик"

"Биринчи навбатда бугунги ўйинга пухта тайёргарлик кўргандик. Биз "Андижон" қандай ўйнашидан хабардор эдик. Андижондан бир очко билан қайтаётганимиз яхши. Бундай мухлислар олдида ўйнаш осон эмас. Ўзимизнинг мухлисларга ҳам раҳмат, улар узоқ йўл босиб келишди. Бугунги ўйиндаги иштиёқ ва кураш учун футболчиларимдан миннатдорман", - деди Жамшид Саидов.

- "Қизилқум"нинг асосий таркиб футболчилари Ғиёсов ва Кухианидзе бугунги учрашувда майдонга тушишмади. Ушбу ҳолат жамоангиз ўйинига қанчалик таъсир ўтказди?

- Жароҳат ва сариқ карточкалар туфайли улар бугунги баҳсни ўтказиб юбордилар. Бу ўз сўзини айтди.

- Иккинчи таймда майдонга туширилган Бобомурод Бозоров яна захирага олинди. Бунга нима сабаб бўлди?

- Бу тактик ўзгариш эди.

- Жорий мавсум Кубокда ва Суперлигада "Қизилқум" "Андижон"ни мағлуб эта олмади. Бунга нима сабаб бўлди деб ўйлайсиз?

- Биз Хомяков билан узоқ вақт давомида бирга ишлаганмиз. "Андижон" жамоасини ҳам жуда яхши танийман. Биз назорат ўйинида ҳам жанговар дурангга имзо чеккандик. Бу рақобат. Суперлигадаги рақобат йилдан-йилга ўсиб бормоқда.

- "Қизилқум" бугун бир очкони қўлга киритдими ёки икки очко йўқотдими?

- Менимча бир очко қўлга киритдик.