Ўйин давомида икки тўп фарқи билан ортда қолаётган Кристиан Киву шогирдлари ирода намойиш этиб, 3:2 ҳисобида ғалаба қозонишди.
Учрашув меҳмонлар учун жуда кўнгилли бошланди. 32-дақиқада хорватиялик Мартин Батурина "Комо"ни ҳисобда олдинга олиб чиққан бўлса, иккинчи бўлим бошида, 48-дақиқада Лукаш Да Кунья миланликлар дарвозасини иккинчи бор ишғол қилди.
Бироқ "Интер" таслим бўлишни истамади. 69-дақиқада Хакан Чалханоглу ҳисобни қисқартирди. Ўйин якунланиши арафасида эса ҳақиқий "шоу" бошланди: 86-дақиқада Чалханоглу дублни расмийлаштириб, мувозанатни тиклаган бўлса, 89-дақиқада Петар Сучич "нерадзурри"га ғалаба келтирувчи голни урди.
“Интер” - “Комо” 3:2
Голлар: Чалханоглу 69, 86, Сучич 89 - Батурина 32, Да Кунья 48.
Жамоалар ўртасидаги илк баҳсда (3 март) ҳисоб очилмаган эди (0:0). Шу тариқа, икки ўйин натижасига кўра "Интер" финал йўлланмасини қўлга киритди. Иккинчи финалчи эса бугун, 22 апрель чоршанба куни аниқланади. Унда "Аталанта" ва "Лацио" жамоалари ўзаро тўқнаш келишади (илк ўйин — 2:2).
