Ироқ мураббийи ФИФАдан ЖЧ плей-офф ўйинини қолдиришни сўради: "Бизга тайёргарлик учун вақт керак"

Эрон ва АҚШ ўртасидаги можаролар жамоанинг ушбу муҳим ўйиндаги иштирокини хавф остида қолдирмоқда.

Тарихий имконият хавф остида:

Эслатиб ўтамиз, 31 март куни Мексикада Ироқ терма жамоаси Суринам ва Боливия ўртасидаги плей-офф ғолибига қарши майдонга тушиши белгиланган. Бу баҳс ироқликларнинг 1986 йилдан бери илк бор мундиалга йўл олиш тақдирини ҳал қилади.

Мураббийнинг таклифи қандай?

Арнолд ўз интервьюсида вазият қанчалик жиддий эканини ва ФИФАдан қандай ёрдам кутаётганини тушунтириб берди:

"Илтимос, бу ўйин борасида бизга ёрдам беринг, чунки ҳозир футболчиларимизни Ироқдан олиб чиқиб кетиш учун бор кучимиз билан ҳаракат қиляпмиз. Менимча, агар ФИФА ўйинни қолдирса, бу бизга яхшилаб тайёргарлик кўриш учун вақт беради. Майли, Боливия шу ойда Суринам билан ўйнасин, Жаҳон чемпионатидан бир ҳафта олдин эса биз АҚШда ғолибга қарши майдонга тушамиз – ўша ўйин ғолиби турнирда қолади, мағлуб эса уйга қайтади.

Шунингдек, бу ФИФАга Эрон нима қилишини ҳал қилиб олиши учун ҳам кўпроқ вақт беради. Агар Эрон мусобақада иштирок этишдан бош тортса, биз тўғридан-тўғри Жаҳон чемпионатига йўл оламиз. Бу эса саралашда биз мағлуб этган БАА терма жамоасига Боливия ёки Суринамга қарши ўйинга тайёргарлик кўриш имкониятини яратади", — деди Арнолд.

Халқаро футбол ташкилоти ҳозирча мураббийнинг бу илтимосига расмий жавоб қайтармади.