Ҳумоюн Муртозаев: “Хомяков қайтгач, ўйин услубимиз ҳам ўзгарди”

“Газчилар”нинг водийдан бир очко билан қайтишида жамоанинг тажрибали ҳужумчиси Ҳумюн Муртозаевнинг ҳиссаси катта бўлди. Шу боис championat.asia талқинига кўра, 29 ёшли футболчи рамзий терма жамоадан ўрин олди.

- Ҳумоюн, “Андижон” билан ўтган ўйин ҳақида фикрингиз қандай?
- Водийда бизга осон бўлмаслигини олдиндан яхши билардик. Шунга яраша ўйинга тайёргарлик кўрдик. Ўйинни аввалига яхши бошладик ва тезкор гол уришга эришдик. Кейинчалик мезбонлар ҳам ҳужумга зўр бериб, пенальтидан жавоб тўпини киритди. Шундан сўнг очиғини айтганда, дуранг натижани сақлаб қолишга эътибор қаратдик.

- “Машъал” шу куни бир очко ишладими ёки икки очко йўқотдими?
- Менимча учрашувнинг охирларида ҳар икки жамоа ҳам ғалаба тўпини киритиб, уч очкога эга чиқишга жуда яқин келганди. Аммо совуққонлик етишмасдан якунда дуранг натижаси сақланиб қолинди. “Машъал”ни сафарда ўйнаганини инобатга оладиган бўлсак, бир очко ҳам ёмон натижа эмас. Аслида эса уч очко олиш мақсадида боргандик.

- Александр Хомяков келгач жамоанинг ўйин услубида ҳам ўзгариш бўлдими?
- Александр Андреевич тажрибали мураббий эканлигига ҳеч қандай шубҳа йўқ. Илгари “Машъал”ни узоқ йиллар давомида бошқаргани учун ҳам россиялик мутахассиснинг яна жамоага қайтарилиши айни муддао бўлди. Табиийки Хомяковнинг ўз ўйин услуби бор. Унгача эса испаниялик мутахассис қўли остида бошқача тактика асосида шуғуллангандик. Энди ўйин услубимизда ҳам ўзгаришлар бор.

Coca Cola Суперлига. 4-тур рамзий терма жамоаси         

 
- Рамзий терма жамоа ҳақида фикрингиз?
- Championat.asia сайтини мунтазам равишда кузатиб борган холда, футбол янгиликларидан хабардор бўлишига ҳаракат қиламан. Тўғриси бу сафар рамзий терма жамоага тушишимни хаёлимга ҳам келтирмагандим. 4-тур якунларини кўриб, жуда хурсанд бўлдим. Бунинг учун сайт ижодкорларига раҳмат айтаман.