"Ал Насср" ҳужумчиси Жоау Феликс Европа футболига қайтишни ният қилган ва Чемпионлар лигасида иштирок этадиган жамоа қидирмоқда. Футболчи учун устувор танлов - "Барселона" бўлиб қолмоқда. Ўйинчининг вакили Жорже Мендеш "кўк-анорранглилар"га унинг клубга эркин агент сифатида қайтиш истаги борлигини маълум қилди. Бу ҳақда Sport.es хабар бермоқда.
Манба маълумотига кўра, "Барселона" айни пайтда 26 ёшли ҳужумчининг қайтишини устувор вазифа деб ҳисобламаяпти. Шу билан бирга, "кўк-анорранглилар" Феликс номзодидан бутунлай воз кечишгани йўқ. Клуб мавсум якунида, португалиялик футболчи билан эркин агент сифатида шартнома имзолаш варианти жозибадор бўлиши мумкин бўлган вақтда жамоанинг эҳтиёжларини таҳлил қилмоқчи.
Феликс 2023/2024 йилги мавсумда "Атлетико"дан ижара асосида "Барселона"да ўйнаган эди. Унинг "Ал Насср" билан амалдаги шартномаси 2027 йилнинг ёзига қадар мўлжалланган.
