– Сиздан доимо Месси ва Марадона ҳақида сўрашади. Бу саволлардан чарчамадингизми?
– Йўқ, чарчамадим, лекин уларнинг маъносини унчалик тушунмайман, чунки булар турли даврлар эди. Месси Диегодага қараганда анча кўп гол уради. Диего пас беришни афзал кўрарди ва жамоа учун кўпроқ ишларди. Месси – тўпурар. У майдонда юради ва ҳужум гол билан якунланиши учун ҳамма нарсани қилади. Диего эса бошқача эди. Биз, аргентиналиклар эса икковимиз ҳам бўлганидан бахтиёрмиз, лекин мен танлай олмасдим.
Рақамлар бўйича Месси Диегодадан анча устун. Лекин харизма ва томошабоплик ҳақида гапирадиган бўлсак, менда шубҳалар бор.
– Аммо мана бу жаҳон чемпионати Мессининг устунлигини исботламаяптими?
– Месси анча тўғрироқ, интизомли одам. У яхши инсон, яхши оиласи бор. Диего эса атрофида содир бўлаётган ҳамма нарсани шоуга айлантирарди. Аргентиналиклар учун баҳс ҳали ҳам тенг – 50 га 50. Биз Мессининг Марадонадан яхшироқ ёки ёмонроқ эканини ҳал қилиш учун унинг жаҳон чемпионатида ғолиб чиқишини кутмадик. Уларнинг иккаласи ҳам доимо ёнма-ён турган, чунки иккови ҳам буюк ишлар қилган. Кейин эса баҳслар бошланади: Месси буюк жамоаларда ўйнаган, Диего эса кўпинча деярли ёлғиз ўзи тортиб юрган, шунинг учун мунозаралар кўп.
Ягона аниқ нарса шуки: Марадона унгача ҳеч ким қилмаган ишларни қилган, ҳозир эса Месси унгача ҳеч ким қилмаган ишларни қилмоқда.
– Диего ҳақида гапириб беринг, сиз у билан яхши мулоқот қилгансиз.
– Диего ажойиб инсон эди. Унинг юраги катта эди. У ҳамманинг – жамоадошлари, клуб ходимлари, ҳар бир кишининг яхши бўлиши учун ўзида бор нарсани берарди. Ҳаммаси айнан шундай тугаганидан жуда афсусдаман, чунки у анча кўпроқ ёрдамга лойиқ эди. Тўғри, у баъзида кўнгилсизликларга учрарди, охирида гапираётган гапини ҳам ҳар доим тушунмасди, лекин у яхши инсон эди. Кейин эса, у ҳеч ким яшамайдиган ҳаётни яшаб ўтди.
Биз муаммолар ҳақида ўз тажрибамиздан келиб чиқиб мулоҳаза юритамиз, лекин Диегонинг ҳаёти оддий эмасди. Биз унинг ўрнида туғилганимизда нима қилардик, тасаввур қилиш жуда қийин. Аллқачон 6-7 ёшида унинг ҳамма нарсаси бор эди. Ҳеч ким унга "йўқ" демасди. Биз нима қилардик – билмайман. Ўйлайманки, ўша вазиятда биз ҳам худди шундай қилган бўлардик, – деди Батистута.
