18 ёшли Клеман Л. "Реал" ҳужумчиси Килиан Мбаппе билан бирга бир қанча бадавлат кишиларни талон-торож қилиш ёки ўғирлаб кетиш режалари сабабли қамоққа олинди.
Le Parisien нашрининг хабарига кўра, Клеман Л. 26 кишига нисбатан ноқонуний ҳаракатларни амалга оширишни режалаштирган тўданинг етакчиси бўлган. Мбаппедан ташқари, номи ошкор қилинмаган рэпер, гўшт савдогари ва бизнесменлар ҳам эҳтимолий қурбонларга айланиши мумкин эди. Клеман ижтимоий тармоқларда "Лестер Z" тахаллуси остида шерикларига буйруқлар берган.
21 август куни Клеман ўз шерикларидан бири билан биргаликда апрель ойида содир этилган соатсозни талон-торож қилиш бўйича расман айбланди. Мусодара қилинган телефонлар ўрганиб чиқилгач, у 11 апрелдан 19 августгача бўлган даврда яна бир қанча талончилик ёки ўғирликларни режалаштиргани маълум бўлди.
Клеман ҳибсга олиниб, бир кишилик камерага жойлаштирилди, унинг эҳтимолий шериги эса озод қилинди, аммо суд назорати остида қолди.
