Инсайдер Фабрицио Романо "Фенербахче" ҳамда Саудиянинг "Ал-Иттиҳод" клуби ўртасида француз ярим ҳимоячиси Н'Голо Канте трансфери бўйича олиб борилаётган музокаралар тафсилотларини маълум қилди. Шунингдек, у футболчининг агентлари билан Англия Премьер-лигасининг бир клуби боғланганини таъкидлади.
Романонинг сўзларига кўра, "Фенербахче" Канте трансферини якунлаш учун жиддий ҳаракат қилмоқда. Футболчи билан шахсий шартнома деярли тайёр, фақат айрим майда масалаларни ҳал этиш қолган. Турк клуби айнан шу жиҳатлар сабаб музокараларни тезлаштиришга уринаётгани қайд этилди.
Бунга асосий сабаб сифатида "Фенербахче" раҳбарияти ўтган дам олиш кунлари Англия Премьер-лигасининг номаълум клуби Н'Голо Канте агентлари билан алоқага чиққанидан хабардор экани келтирилди. Англия клублари футболчини сафига қўшиб олиш имкониятларини ўрганмоқда.
Шу боис "Фенербахче" музокараларда фаолликни ошириб, келишувни яқин кунларда якунлаш ниятида. Романонинг таъкидлашича, Канте билан битим якуний босқичга яқинлашган ва ушбу трансфер француз ярим ҳимоячиси учун жаҳон чемпионати олдидан муҳим қадам бўлиши мумкин.
