- Ўйинни яхши бошлагандик ва уч-тўртта қулай имкониятлардан фойдалана олмадик. Аксинча биринчи бўлимда "Металлург" битта вазиятидан фойдаланиб кетди. Иккинчи бўлимда ҳисобни тенглаштириш учун очиқ ўйин кўрсатдик ва қарши ҳужумларда жазоландик. Бизда 7-8 нафар футболчи янги, шу сабабли жамоавий ўйин тузишга бироз қийналяпмиз. Асосий таркибдаги 7-8 нафар футболчи Суперлиганинг яхши жамоаларига кетишди, уларни ҳайдаб юборганимиз йўқ. Уларнинг ўрнини эса захирада қолган ва ўйин амалиёти бўлган футболчилар эгаллади. Уларнинг жисмоний ҳолатини яхшилаш учун вақт керак бўлади.
- "Олимпик-Мобиуз" билан ғалабадан кейин кетма-кет иккинчи мағлубият. Бу янгиларнинг жамоага қўшилиб ололмаётгани билан боғлиқми?
- Ҳозирча жисмоний ҳолатда озгина муаммо бор. Келган футболчилар жисмоний ҳолатини тиклаб олса, бемалол ғалаба қозонамиз.
- "Металлург"га қарши ўйинда нималарни режа қилгандингиз ва шогирдларингиз буни бажара олишдими?
- Бу жамоани биламиз, таркибида тажрибали футболчилари бор. Агарда ҳозиргидек иккинчи бўлимда уларга имконият берсак, улар бундан фойдаланиб кетишади. Иложи борича биринчи бўлимдаги каби ўйин бермасликка ҳаракат қилдик, бироқ буни амалга ошириб бўлмади. Биз рақибга тўп тушганда уларга ўйин бермасликка ҳаракат қилмоқчи эдик. Тўп бизда бўлганида кўпроқ ушлаб туришимиз керак эди. Биринчи бўлимда бу кўпроқ ўхшади, иккинчи бўлимда эса йўқ.
- Жамоа биринчи даврани анча яхши ўтказди ва жадвалда 3-ўринда эди. Жамоа олдига қандай аниқ вазифа қўйилганди?
- Аниқ вазифа қўйилмаган. Университет жамоалари барча футболчиларга иккинчи имконият каби. Улар бу ерда яхши ўйнаб кетишса, бу Суперлигага қайтиш учун имкон бўлиши мумкин. 7-8 нафар футболчиларимиз яхши жамоаларга кетди. Бир томондан бу вазифани уддаладик, лекин бу билан қаноатланиб қолмаймиз. Мен йигитларга ишонаман. Иккинчи даврада ҳам улар ўз сўзини айтади. Ўйинни шакллантириб олсак, футболчилар ўзларини кўрсатади.
