Достонбек Ҳамдамов "Ўзбекистон белгиси" кўкрак нишони билан тақдирланди

Биринчи Президентимизнинг 2003 йил 4 августдаги фармонига асосан “Ўзбекистон белгиси” кўкрак нишони билан халқимизнинг ифтихорига айланган, юксак ватанпарварлик, фидойилик туйғуси, меҳнатсеварлик фазилатларини ўзида мужассамлаштирган, Ватанимиз обрўси, шон-шуҳратини юксалтиришга, унинг халқаро нуфузини янада оширишга хизмат қилаётган, мамлакатимизнинг ижтимоий-сиёсий ҳаётида фаол иштирок этиб, тенгдошларига намуна бўлаётган ёшлар тақдирлаб келинмоқда.

Маросимда илм-фан, маданият, санъат, таълим, соғлиқни сақлаш, журналистика, спорт, қишлоқ хўжалиги, кичик бизнес, ҳуқуқ ва ҳарбий соҳаларда ўқиётган, ишлаётган ҳамда илмий-ижодий фаолият билан шуғулланиб, юксак натижаларга эришаётган 50 нафар йигит-қизга “Ўзбекистон белгиси” кўкрак нишони тантанали топширилди.

Тақдирланганлар орасида Ўзбекистон терма жамоаси ва "Бунёдкор" клуби футболчиси Достонбек Ҳамдамов ҳам бор.

"Ўзбекистон Белгиси" кўкрак нишони билан тақдирланганимдан жуда ҳам хурсандман. Тўғриси кутмаган эдим. Мен учун кутилмаган ёқимли совға бўлди десам ҳам бўлаверади. Ушбу мукофотимни барча юртдошларимга бағишлайман", - дейди Достонбек Ҳамдамов.

Сайтимизнинг Instagram даги саҳифаси - instagram.com/championat.asia