1 июль санасига қадар Бухоро футбол академияси стадиони майсасини Суперлига даражасига қайтариш ишлари якунига етмади. Лига майдоннинг айни вақтдаги ҳолати ҳақида маълумотларга эга. Шунингдек, Суперлига регламентида қайд этилган техникани сотиб олиш ва уни Бухоро шаҳрига олиб келишга ҳозирча улгурилмаган. Ўтган вақт давомида Лига мазкур масала юзасидан истисно тариқасида Бухоро футбол академияси стадионини рўйхатдан ўтказган бўлса-да, мазкур ишни якунлаш пайсалга солинди. Лига маълумотига кўра, Бухоро футбол ассоциацияси талаб этилган техника учун пуллик тўловни амалга оширган. Бироқ техника яна бир неча кундан кейингина етиб келиши режалаштирилган. Бунинг оқибатида, майдон сифатини асл ҳолига қайтариш ишлари жуда кеч бошланган.
Шундан келиб чиқиб, Суперлига 13-туридан ўрин олган "Бухоро" — "Бунёдкор" учрашуви Бухоро шаҳрида ўтказилмайди. Клуб мазкур беллашув ўтадиган стадион масаласини яқин соатлар ичида ҳал қилиши талаб этилади.
Ўз навбатида, Бухоро футбол академияси стадионини Суперлига стадионлари рўйхатига қачон қайтиши масаласи бўйича масъулиятни Лига ўз зиммасига олмайди. Бироқ майдон ҳолати яхшилангач, уни қайта мониторинг қилиш ва иложи борича тезроқ расмий учрашувларга қайтариш масаласини тезлик билан ҳал қилишга тайёр эканлигини маълум қилади.
Изоҳ. "Бухоро" футбол клуби белгиланган дедлайнга қадар муаммони тўлиқ бартараф этмаса, расмий учрашув "Бунёдкор" майдонига кўчирилиши ҳақида огоҳлантирилганди. Бироқ айни вақтда "Бунёдкор" стадионининг ўзида айрим муаммолар мавжуд эканлигидан келиб чиқиб, Лига "Бухоро" клубига нейтрал майдон масаласини ҳал қилиш имкониятини тақдим этди.
