Улсан стадионида бўлиб ўтган мазкур баҳсда кореяликлар ҳужумда ўйин услубини топишга қийналди ва асосан дарвозабон Сон Бом Гиннинг ишончли ҳаракатлари эвазига нурсиз дурангни сақлаб қолди. Қайд этиш жоизки, Морено қўл остидаги дастлабки учта ўйинда Жанубий Корея Эквадорни 3:0 ҳисобида мағлуб этиб, Уругвайга 1:4 ҳисобида имкониятни бой берган эди ва ушбу дуранг орқали янги мураббийнинг натижалари бир ғалаба, бир дуранг ҳамда бир мағлубиятни ташкил қилмоқда.
Учрашув давомида майдон эгалари 4-4-2 тактик схемасида ҳаракат қилиб, Сон Хён Мин ва О Хён Гю каби етакчиларини олдинги чизиққа туширди. Бироқ жамоанинг дастлабки хавфли зарбаси фақатгина биринчи бўлимнинг 45-дақиқасига келиб берилди. Иккинчи бўлимда ҳам меҳмонлар бир неча бор хавфли вазиятларни юзага келтирди, ҳаттоки Венесуэла томонидан урилган бир гол офсайд сабабли бекор қилинди. Жанубий Корея эса ўйин охирига қадар бирорта ҳам гол ура олмади ва баҳс нурсиз дуранг билан якун топди.
Ўйиндан сўнг Жанубий Корея терма жамоаси ва "Бавария" ҳимоячиси Ким Мин Жэ жамоадошларининг ҳаракатларидан қаттиқ норозилигини билдириб, кескин фикрлар билдирди. Унинг таъкидлашича, муаммо фақат ҳимоя чизиғида эмас, балки майдонда ҳамманинг бирдек курашмаётганидадир.
"Ҳимоячиларга қарасам, уларга раҳмим келяпти, чунки ўйинда ҳамма бирдек жанг қилаётгани йўқ. Агар жараён шундай давом этадиган бўлса, ҳатто 7:0 ёки 9:0 ҳисобидаги ғалаба ҳам менга қувонч бағишламайди", дея таъкидлади футболчи. Шунингдек, Ким Мин Жэ алоҳида индивидуал ҳаракатлардан кўра жамоавий жипслик муҳимроқ эканини, фақат шундагина терма жамоанинг даражаси ўсишини қўшимча қилиб, барчани майдонда бирдек меҳнат қилишга чақирди.
Эслатиб ўтамиз, Жанубий Корея навбатдаги ўртоқлик ўйинини Ўзбекистонга қарши ўтказади.
