- Ўйин ҳақида фикрингиз?
- Авваламбор бугунги ғалаба билан барча "Жайхун" мухлисларини табриклайман. Ўйинга тўхталадиган бўлсак, баҳс қийин кечишини билардик ва шунга яраша ҳозирлик кўргандик. Босим "ТерДУ"га қараганда бизда кўпроқ бўлди ва бу ўйинни қийинлаштирди. Рақибнинг йўқотадиган нарсаси йўқ эди, шу боис эркин ҳаракат қилди. Учрашув қўл остимизда ўтди, майдондаги устунликни ҳисобда ҳам акс эттира олдик. Биринчи таймда ҳисобни очдик. Иккинчи бўлимда ҳам гол уришга ҳаракат қилдик. Захирадан тушган футболчилардан хафа бўлдим, чунки ўйинни кучайтира олишмади.
- Рақибдан асосан қайси жиҳатлар бўйича жамоангиз устун кўринди?
- Ўйин услуби ва жисмоний тайёргарлик ҳамда руҳият томонлама биз устун эдик. "ТерДУ" жамоасида ҳам яхши футболчилар кўп, бироқ билишимча, уларда ички муаммолар бор, бу эса яхши ўйнашга халақит беряпти.
