Vadim Abramov: "Barchasiga o'zimiz aybdormiz"

- O'yin davomida 3:1 hisobida oldinda borayotib, o'yin oxirida 3:3 hisobini qayd etish yoqimsiz, albatta. Biz yomon o'ynadik. Yutqazishimiz ham mumkin edi. Barchasiga o'zimiz aybdormiz. Orada 20 kundan ortiq tanaffus yuzaga kelgani ham o'z tasirini ko'rsatdi. Axir, 20 kundan ko'proq o'ynamadik, yaxshi sport formasini saqlab qolish qiyin. Futbol shunisi bilan qiziq, endi xatoni tuzatishimiz shart. 

- Tanaffusdan keyin ketma-ket uchta o'zgarish bilan o'yinda o'zgarish qilindi – jamoa 3:1 hisobida oldinga chiqib oldi. Ammo so'nggi daqiqalarda aynan nima etishmadi?

- Hisob 3:1 bo'lganida shunchaki to'g'ri o'ynashimiz kerak edi. O'yinni tinchlantirishimiz va paslar orqali o'ynashimiz lozim edi. Biz esa xatolarga yo'l qo'ydik. Yosh o'yinchilar hissiyotga berilib, o'ynashdi. Raqibning standartlari bizga muammolar yaratdi. Har bir standart vaziyatidan keyin shoshma-shosharlikka yo'l qo'ydik. Biz standartlar bo'yicha raqibga yutqazdik. 

- «Lokomotiv» ham «Mashal» bilan durang qayd etdi...

- O'yin oldidan bu o'yin durang bo'lsa kerak, deb taxmin qilgandim. Kurash qizimoqda, ko'ramiz, buyog'i ham qiziq bo'ladi. 

Keyingi o'yinlarda tarkibda o'zgarishlarga qo'l uramiz. Bugun markaziy chiziq ko'p vaziyatlarni boy berdi. Xatolar esa noto'g'ri o'ynaganimizdan bo'ldi. 

- Tanaffusdan keyin qatorasiga o'zgarishlarga qo'l urdingiz. Asosiy tarkibni tanlashda xato qildim, deb hisoblaysizmi?

- Orada katta tanaffus yuzaga kelgani uchun tarkibni tanlash qiyin bo'ladi. CHunki mashg'ulotlarda ham barcha o'yinchilarni holati haqida aniq tasavvurga ega bo'lish qiyin. Men oxirgi o'yinlarda maydonga tushirgan tarkibni tushirgandim.

Jamoa shijoatidan qoniqdimmi? 3:3 hisobi muxlislar uchun qiziq bo'lishi mumkin, ammo biz hozirgacha turnirda faqat bitta gol o'tkazib yuborgan edik. Bugun esa 3ta qo'yib yubordik. Bu meni tashvishlantiradigan jihat. SHu holatda ham darvozabonimizni etirof etish kerak, Farhod Rahmatov ko'p vaziyatlarga darvozani goldan saqlab qoldi, - deydi Vadim Abramov o'yindan keyin.