Vadim Abramov: "O'z vaqtida Badjo penaltidan gol ura olmagan, Messi ham zarbada adashgan. Bu juda qiyin ish"

"Golsiz o'yin bo'lgan bo'lsa ham muxlislar uchun qiziqarli o'yin bo'ldi deb o'ylayman. Birinchi bo'limni yomon o'tkazmadik. Ikkinchi bo'limda esa o'yinimizda pasayish kuzatildi. Keyin esa klass o'z so'zini aytdi. "Paxtakor" penaltilar seriyasini yaxshiroq ijro etdi, biz esa "lotereya"da xato qildik. Yigitlardan minnatdorman ular kuchli raqibga qarshi kurashishdi va borini berishdi. Futbol shunday o'yin. Bugungi natija shunday bo'lishi kerak ekan"  - dedi Vadim Abramov uchrashuvidan yakunlanganidan so'ng.

- Jamoangiz finalga bir qadam qolganida mag'lub bo'lgani sizni xafa qilishi aniq. Biroq "Paxtakor" tarkib jihatdan va ko'plab boshqa faktorlar bo'yicha "Dinamo"dan ustun edi. "Paxtakor" chempionatda deyarli barcha imkoniyatlarini yo'qotdi va bor etiborini Kubok bahslariga qaratdi. Bugungi uchrashuv penaltilar seriyasiga qadar davom etdi. O'yin shunchalik cho'zilgani, bugun "Dinamo" munosib o'yin namoyish etgani va oxirigacha kurashganini anglatadi. Jamoangiz faqatgina penaltilar seriyasida mag'lub bo'lgani biroz bo'lsa ham mag'lubiyat alami hissini kamaytira oldimi? Masalan, "Dinamo" bugun asosiy vaqtda mag'lub bo'lsa ham, ushbu voqeylik sensaciya deya qabul qilinmas edi. "Paxtakor" baribir favorit edi....

- Bu haqda gapirish qiyin. Misol uchun, asosiy vaqt yoki ekstra taymlarda mag'lub bo'lganimizda ham ahamiyati yo'q edi. 11 metrlik zarbalar seriyasida mag'lub bo'ldik, ammo bu natijamiz uchun medal berishmaydi. Barchasi unutiladi, kelajakda esa tarixda "Paxtakor" "Dinamo"ni yarim finalda mag'lub etgan deyiladi va bo'ldi. O'yin ham unutilib ketadi. O'tgan mavsum Kubok bahslarining birortasida mag'lub bo'lmadik, lekin musobaqani guruh bosqichidayoq yakunladik. Joriy mavsumda esa asosiy vaqtda engilganimiz yo'q. Biroq finalda emasmiz. Afsuski hayot shunday. Mag'lubiyatni to'g'ri qabul qilishimiz va davom etishimiz kerak. Superliga o'yinlari oldinda, yo'qotilgan ochkolar bo'yicha etakchilardan birimiz. Umuman olganda, joriy mavsum "Paxtakor"ga asosiy vaqtda mag'lub bo'lmadik. Muxlislarimiz ranjishganidan xabardorman. Ularni ham tushunaman.

- "Dinamo" ketma-ket ikkita o'ta muhim o'yinda mag'lub bo'ldik. Endi jamoani ruhlantirish qiyin bo'lsa kerak? Ruhiy holat ancha yomonlashib ketishi mumkin. Lekin taqvim bo'yicha keyingi raqiblar unchalik kuchli emas...

- Men bunday demagan bo'lardim. Har bir raqibga siz aytganingizdek yondashuv qilsak, mavsum biz uchun omadsiz o'tayotgan bo'lardi. To'g'ri yondashuv qilish kerak. Professionalizm ham shunday vaziyatlarda seziladi. Oldinda 9ta o'yinimiz bor. Qolgan jamoalarda esa 8ta uchrashuv qolgan. Biz hali kurashdamiz va davom etishimiz kerak. Hammasi o'zimizga bog'liq va hali hammasi oldinda.

- O'tgan mavsum yakunida, yani so'nggi 5-6 uchrashuvda "Dinamo" ketma-ket mag'lub bo'lgandi va mavsum yakunini omadsiz o'tkazgan edi. Bugun jamoa Kubokdagi ishtirokini yakunladi. O'tgan mavsum so'ngidagi "omadsiz" scenariy takrorlanmasligi uchun nimalar qilishini kerak deb o'ylaysiz?

- O'tgan mavsum yakunida medallar uchun kurashish imkoniyatidan mahrum bo'lgandik va ligani tark etish xavfi yo'q edi. O'rtada bo'lib qolganimiz uchun shunday holat kuzatilgan edi. Shuningdek, bu yil jamoa o'tgan mavsumdagidan ko'ra kuchliroq deb o'ylayman.

- Penaltilar seriyasi o'zbek futboli uchun muammoga aylanib qoldi. Terma jamoamiz ham so'nggi katta musobaqani seriyadagi mag'lubiyat tufayli tark etdi. "Dinamo" penaltilarni mashq qilganmidi? Ikkinchidan, Hojimirzaev jamoadagi eng tajribali futbolchilardan biri. Gol urish u juda sovuqqon, ammo seriyadagi imkoniyatidan foydalana olmadi. Hojimirzaevdan tashqari boshqa o'zbek futbolchilari ham penaltidan unumli foydalana olishmayapti. Bu salbiy tendenciyaning sababi nimada?

- Marko ham gol ura olmadi. U o'zbek emas. Penalti shunday narsa, har qanday futbolchi gol ura olmasligi mumkin. O'z vaqtida Badjo penaltidan gol ura olmagan, Messi ham zarbada adashgan. Bu juda qiyin ish. Katta bosim. Hakamlar va futbolchilar bosim tufayli xato qilishadi. Bunday vaziyatda bosim judda katta bo'ladi. Men mashg'ulotlarda o'nta zarbadan o'ntasi golga aylantirishim, maydondagi imkoniyatdan ham unumli foydalana olaman degani emas. Marko har doim gol urib kelgan, "Nasaf"ga qarshi o'yinda "panenka" zarbasini ijro etgandi. Ratino ham "Navbahor"ga o'yinda gol ura olmagandi. Agar penaltidan gol ura olmaganimizda ochkolarimiz soni ko'proq bo'lgan bo'lar edi. Bugun ham shunday bo'ldi, afsuski.