U-19 terma jamoasi bosh murabbiyi Farhod Nishonov U-20 Osiyo kubogi saralash bosqichi startidan avval o'z fikrlari bilan o'rtoqlashdi

— Saralash bosqichi haqida

— Avvalambor, musobaqa tashkilotchilariga o'z minnatdorchiligimni aytib o'taman. Tashkiliy jihatdan barcha narsa amalga oshirilgan. Musobaqani yuqori saviyada o'tkazish borasida kerakligi ishlar qilinganligi ko'rinib turibdi. Saralash o'yinlari haqida gapiradigan bo'lsam, oldimizda bizni muhim uchrashuvlar kutib turibdi. Guruhimizda kuchli jamoalar yig'ilgan. Xususan, Saudiya Arabistoni, Xitoy kabi futboli rivojlangan, shuningdek, Myanma va Maldiv kabi o'z oldiga yuqori maqsadlarni qo'ygan jamoalarga qarshi maydonga tushamiz. 

— Jamoangiz bu turnirga qanday tayyorgarlik olib bordi?

— Dammamga kelishimizdan avval Yaponiya va BAAda yig'in o'tkazdik. Xususan, SHizuokada Yaponiya va Urugvay kabi jamoalarga qarshi bahs olib bordik va etarlicha tajriba to'pladik.   

— Musobaqaning ahamiyati

— Bilasiz, O'zbekiston bu turnirning final o'yinlariga mezbonlik qiladi. SHu sababli bizda katta masuliyat bor. Musobaqada o'zimizning bor imkoniyatlarimizni ishga solib, kuchli tomonlarimizni ko'rsatishga harakat qilamiz. 

— Saudiya Arabistoni terma jamoasining imkoniyatlari haqida

— Saudiya Arabistoni Osiyo futbolida o'z o'rniga ega. Har bitta yosh toifasida yaxshi futbolchilari bor. Biz bu jamoaning imkoniyatlarini yaxshi bilamiz. Musobaqaning final o'yinlariga yo'llanma olganimiz hech qanday ahamiyat kasb etmaydi. Biz mezbonlarga qarshi bor kuchimizni ishga solib, g'alaba uchun harakat qilamiz.