Tur iqtiboslari: "Faqat "Paxtakor"ga omad tilayman, qolgan raqiblarga sog'liq"

"Paxtakor" - "Navbahor" (1:0) uchrashuvidan keyin SHota Arveladzega "Ertangi "Bunyodkor" - "Lokomotiv" uchrashuvida "Loko"ga omad tilaysizmi?", deb berilgan savolga "Paxtakor" bosh murabbiyi quyidagicha javob qaytardi:

"Men faqat "Paxtakor"ga omad tilayman. Qolgan raqiblarga esa sog'liq", - dedi SHota Arveladze.

"Bunyodkor" - "Lokomotiv" (1:2) uchrashuvidan keyin "qaldirg'ochlar" ustozi Mirjalol Qosimov barchaga insof so'radi.

"Penalti yo'q edi. Hech qanday penalti bo'lmagani xattoki men o'tirgan joydan ko'rindi. Hammaga insof bersin! "Bunyodkor" nima bo'lgan taqdirda ham oxirigacha kurashadi", - dedi Mirjalol Qosimov.

SHuningdek, "Bunyodkor" darvozaboni Murod Zuhurov "Buyog'iga har turdan oldin penalti qaytarish borasida alohida shug'ullanish kerakdir", deb berilgan savolga quyidagicha javob qaytardi:

"Balki rostanam endi har turdan oldin penalti qaytarish borasida alohida shug'ullanishni odatga aylantiramiz shekilli. "Bunyodkor" yutuq uchun qo'ldan kelgancha harakat qildi. Ammo hamma narsa faqatgina bizning harakatimizga bog'liq emas ekan", - dedi Murod Zuhurov.

"Bunyodkor" himoyachisi va ikkinchi penalti belgilangan vaziyatda asosiy ishtirokchilardan biri bo'lgan Anvar G'ofurov esa Marat Bikmaevga insof tiladi.

"Marat Bikmaevga insof bersin! To'g'ri, u o'z ishini qildi. Ammo evropa futbolida bunday jentelmenliklarni ko'rganmiz. Baribir odam insoniylikni yo'qotmasligi kerak. Bikmaev penalti yo'qligini bosh hakamga aytsa bo'lardi", - dedi Anvar G'ofurov.