Timur Kapadze: "Natija adolatli bo'ldi deb o'ylayman, JCHga chiqqanimizdan so'ng ham bosh murabbiy bo'lib qolishga umid qilaman"

"Avvalo, Eron terma jamoasini jahon chempionatiga yo'llanma olgani bilan tabriklayman va ularga ushbu musobaqada muvaffaqiyat tilayman. O'yin qiziqarli va hayajonli bo'ldi, ikkala jamoa ham imkoniyatlarga ega bo'ldi. Natija adolatli bo'ldi deb o'ylayman. Eronni engishimiz ham mumkin edi, ammo bu amalga oshmadi. Endi biz keyingi o'yin haqida o'ylaymiz va saralashdan o'tishga harakat qilamiz.

Ushbu ajoyib o'yin uchun shogirdlarimga va stadionga tashrif buyurgan o'zbekistonlik muxlislarga minnatdorchiligimni bildiraman. O'zbekiston xalqi jahon chempionatiga munosib va men ularga duolari uchun tashakkur aytaman. Biz keyingi o'yinda kerakli natijaga erishishga harakat qilmoqdamiz.

Yodimda, 2018 yil saralash bosqichida Eronga yosh jamoa bilan borganimiz. Raqibimiz o'sha paytda jahon chempionatiga jiddiy tayyorgarlik ko'rayotgan edi. Bosh murabbiy Karlush Keyrush edi. Men o'sha paytdagi Eron jamoasini hozirgi jamoa bilan taqqoslamoqchi emasman.

Muxlislarning qo'llab-quvvatlovi va yaxshi tilaklar uchun yana bir bor minnatdorchiligimni bildiraman. Jahon chempionatiga chiqqanimizdan so'ng ham O'zbekiston milliy terma jamoasining bosh murabbiyi bo'lib qolishga umid qilaman", — dedi Timur Kapadze.