Rustam Do'rmonov: "Hakamlar haqidagi gaplar bo'lgan va bo'laveradi"

- Ochig'i, "Yozyovon-Lochinlari"ga qarshi o'yin "og'ir" o'tdi. Bunga bir qator sabablar bor. Xususan, biz o'tgan turda "Cementchi" bilan bo'lgan bellashuvda katta kuch yo'qotgandik. Futbolchilar bu o'yindan keyin o'zlarini tiklab olishga ulgurishmadi. Natijada "Yozyovon-Lochinlari"ga qarshi bahsda o'zimiz xohlagan o'yinni namoyish qila olmadik. Bosh murabbiy sifatida jamoamning o'yini menga manzur bo'lgani yo'q. Ammo aytishim kerak, raqib menda iliq taassurot qoldirdi. Rosti, mehmonlardan bunday o'yin kutmagandim. Ajoyib jamoa shakllanibdi.

Hakam haqidagi gaplar doim bo'lgan va bo'laveradi. Men hakamlarning ishiga aralashmayman. "G'ijduvon" bilan bo'lgan o'yinimizdan keyin ham kaminadan hakamlar haqida so'rashgan edi. O'shanda ham gapirmasligimni aytgandim. Bugun ham shu fikrimda qolaman. Hakamlarning ishini muhokama qilish bizning ish emas. Agar shunday qilsak, nima qilamiz futbolda ishlab?! "Yozyovon-Lochinlari" azolariga hakamlarning qarorlari yoqmagan bo'lishi mumkin. Bu tabiiy hol. Biroq gollarimiz "toza" kiritildi. Balki ularga qoida buzilishlardagi qarorlar yoqmagandir? Yana qaytaraman, men jamoamning o'yinidan qoniqmadim. To'g'risi, shu kuni bizga ko'proq omad kulib boqdi. Ammo birinchi g'alaba qo'lga kiritilganidan xursandman, - deydi Do'rmonov.

Furqatbek Nishonov