Roberto "Barselona"da qolmoqchi

"Barselona" himoyachisi Serji Roberto Kataloniya klubida qolish istagini bildirdi. 30 yoshli himoyachining "ko'k-anorranglilar" bilan amaldagi kelishuvi joriy mavsum oxirigacha mo'ljallangan.

"Biz hali "Barselona" bilan gaplashmadik, lekin men qolishni xohlayman. Avvalroq murabbiylar shtabi mendan mamnun ekanligini va qolishimni aytgandi. Men yana futboldan zavq olyapman va shartnomani uzaytirishdan juda xursand bo'laman. Menda yaxshi tuyg'u bor, "Barsa" libosida o'ynashdan rohatlanishni istayman.

Ishonchim komilki, 2023 yil men uchun juda boshqacha yil bo'ladi va jarohatlar unutiladi. Men bunga 100% aminman. Siz har doim yaxshilanishingiz mumkin, ammo bilamanki, mavsumning ikkinchi qismida har qachongidan ham yaxshiroq bo'laman", – dedi futbolchi.