Osiyolik jurnalist FIFAni tanqid qildi

Ro'yxatdan 11 nafar murabbiy o'rin olgan va ularning hammasi Evropa jamoalarida ishlagan (ishlayotgan) kishilar. Dastavval nomzodlarni keltirib o'tsak. 

Massimiliano Allegri ("Yuventus")
Stanislav CHerchesov (Rossiya terma jamoasi)
Zlatko Dalich (Xorvatiya terma jamoasi)
Dide Desham (Franciya terma jamoasi)
Pep Gvardiola ("Manchester Siti")
Yurgen Klopp ("Liverpul")
Roberto Martines (Belgiya terma jamoasi)
Diego Simeone ("Atletiko")
Garet Sautgeyt (Angliya terma jamoasi)
Ernesto Valverde ("Barselona").
Zinedin Zidan ("Real" sobiq bosh murabbiyi) 

Mazkur ro'yxat elon qilinganidan so'ng Osiyo futbolini yoritib boruvchi jurnalist Jon Derden Fox Sports Asia saytida "FIFA Osiyo, Afrika va Amerikani rad qilyapti" sarlavhali maqola chop etdi. 

Maqola shunday deyiladi: "FIFA 11 kishidan iborat "Eng yaxshi murabbiy" bo'lishga nomzodlar ro'yxatini taqdim etdi. Albatta, ro'yxatdan Yurgen Klopp, Dide Desham, Pep Gvardiola, Zinedin Zidan kabi mashhurlarning joy olishi hech qanday shubha-gumon kasb etmaydi. Lekin bu bilan FIFA yana Evropa tomonida ekanini ko'rsatib qo'ydi. To'g'ri, jahonning eng kuchli ligalari Evropada, jahon chempioni bo'lgan jamoa ham Evropadan. SHu tomonlama ro'yxat to'g'ri tuzilgan deyish mumkindir". 

"Lekin bu ro'yxatda boshqa konfederaciyalardan ham hech bo'lmaganda ikki nafar nomzod ko'rsatilishi lozim edi. Bu shuni anglatyaptiki, sen toki eng kuchli jamoalarda ishlamas ekansan, doim ko'zdan chetda qolaverasan. Albatta, UEFA chempionlar ligasida muvaffaqiyat qozonish oson emas. Bu musobaqani butun dunyo kuzatadi. Lekin saviya jihatidan ECHLga teng kela olmasa-da, Osiyo chempionlar ligasi ham o'ziga yarasha o'rniga ega. Saviya bir xil emasligi har ikkala musobaqaning bir o'rinda turmasligini anglatmaydi".

"FIFA dunyoda jahon chempionati va Evropa ligalaridan boshqa musobaqalar ham borligini unutib qo'yayotgandek. Aytaylik, Roberto Martines Belgiyani JCH yarim finaliga olib chiqdi, lekin uning xizmatlarini Yaponiya termasi ustozi Akira Nishinonikidan baland deya olamizmi? 63 yoshli Nishino jamoani aprel oyida qabul qilib olgandi, lekin u musobaqaga ikki oy qolganida ham yaxshi jamoa tuza oldi. To'g'ri, Belgiya o'zaro o'yinda yaponlarni yutdi, ammo bu Martines Nishinodan kuchli degani bo'lmasa kerak. Qolaversa, mag'lubiyatga qaramay Yaponiya o'zining eng yaxshi o'yinini namoyish etib berdi". 

"Yoki bo'lmasa Eron terma jamoasi ustozi Karlush Keyrushni olaylik. Eron saralash bosqichini juda ajoyib tarzda o'tkazdi. Ular Braziliyadan so'ng mundial yo'llanmasini qo'lga kiritgan ikkinchi jamoa bo'lishdi. Bundan tashqari, Eron o'z guruhida Ispaniya, Portugaliya va Marokashga qarshi o'yin namoyish etdi. Bunday guruhda 4 ochko olish Osiyo jamoasi uchun oson emas". 

"Xuddi shunday tinimsiz mehnat qilgan murabbiylar Afrika bilan Amerikada ham bor. Gap FIFAning taqdirlash marosimi haqida ketar ekan, bu erda dunyoni mintaqalarga bo'lish kerak emas. Kim qaysi ligada ishlamasin, o'z mehnatiga yarasha rag'batlantirilishi kerak. FIFAning ro'yxatida mashhur nomlar bor, ular ko'p yutuqlarni qo'lga kiritgan. Ammo futbolda doim ham g'alaba keltiruvchi golni urgan uchrashuvning eng yaxshi futbolchisi bo'lavermaydi. SHunday ekan, dunyoning eng yaxshi murabbiyi deganda faqat Evropadagi kuchli klublarda ishlayotgan murabbiylarni tushunish to'g'ri emas".

X.Xoliqov tayyorladi.